Sekretáriu Estadu Juventude no Desportu (SEJD), Abrão ‘Nokosiku’ Saldanha, asina akordu ho Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, atu implementa desportu komunitáriu. Imajen Tatoli/Nelia Fernandes.

DILI, 10 dezembru 2021 (TATOLI)—Sekretáriu Estadu Juventude no Desportu (SEJD), Abrão ‘Nokosiku’ Saldanha, sesta ne’e asina akordu ho Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, atu implementa desportu komunitáriu no eskolár iha RAEOA.

Notísia Relevante: SEJD-RAEOA diskute kooperasaun modalidade desportu komunitária

“Objetivu asina akordu ne’e hanesan kontratu interorgániku ida ho autoridade RAEOA atu ajuda implementa atividade ne’ebé planeadu iha nasionál, liu-liu atividade desportu komunitária no eskolár. Tanba, ita hotu hatene katak RAEOA kria ho nia lei no estatutu própriu, goja autonómia inisiativa hosi planu no finansa, entaun ho akordu ne’ebé iha atu halo atividade sira-ne’e iha ne’ebá,” Abrão ‘Nokosiku’ Saldanha, informa ba jornalista sira hafoin remata asina akordu ho Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, iha Sala Gabinete ZEESM, Faról, Dili.

Nia agradese tanba autoridade RAEOA disponivel atu koolabora ho SEJD hodi implmenta atividade ne’ebé SEJD propoin.

“Atividade rua ne’e, desposrtu komunitária no eskolár, ninia orsamentu besik rihun $40,” Abrão ‘Nokosiku’ Saldanha hateten.

Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, hato’o agradese ba Sekretáriu Estadu Juventude no Desportu ba koolaborasaun ne’e tanba RAEOA pertense Repúblika Demokrátika TimorLeste.

“Delegasaun kompeténsia servisu ne’e RAEOA sempre prontu atu hala’o. Ha’u hanoin programa ne’e sei fó benefisiu ba labarik eskola sira no komunidade suku 18 no subrejiaun haat (4) iha RAEOA, no tempu badak ami sei informa fali ba Sekretáriu Estadu ba Juventude Desportu nian konaba programa sira no modalidade detallu no mós proposta sira, nune’e bele implementa ona,” nia dehan.

Desportu ekolár ne’e bele hili tuir fasilidade ne’ebé RAEOA iha, nune’e mós ho depsortu komunitária tanba modalidade importante mak jogu ne’e bele iha partisipasaun hosi komunidade no joven sira.

Bainhira mak realiza atividade desportiva ne’e, nia hatán, iha tempu badak ka iha semana ida ka rua nia laran atividade desportu komunitária no eskolár bele realiza ona iha RAEOA.

“Agora ita haree mós tempu udan no konforme mós preparativu iha eskola sira no suku sira iha RAEOA. Hanesan, iha eskola labarik sira feriadu hela, tanba ezame hotu ona, hosi ne’e sira sei iha oportunidade barak atu bele ense sirania tempu livre ne’e ho jogu escolar,” nia esplika.

Jornalista : Nelia Fernandes

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here