Deputadu sira aprova proposta iha debate no votasaun faze espesialidade, iha sala plenária Parlamentu Naasionál, sesta (10/12). Imajen TATOLI/António Gonçalves

DILI, 10 dezembru 2021 (TATOLI)—Parlamentu Nasionál (PN) liuhosi diskusaun no votasaun faze espesialidade ba Orsamentu Jerál Estadu (OJE) 2022, aprova orsamentu $100.000 ho votu maioria a-favór, atu hadi’a Eskola Téknika Vokasionál Koléjiu Don Bosco Fatumaca, iha munisípiu Baucau.

Proposta númeru 63 hato’o hosi Deputada Maria Angélica Rangel (FRETILIN), Francisco de Vasconselhos (PLP), Antoninho Bianco (FRETILIN) no António da Conceição (PD), ne’ebé husu aumenta orsamentu ba verba Ministériu Edukasaun Juventude no Desportu (MEJD) hodi transfere ba konta eskola no bele hadi’a eskola.

Tuir Deputada proponente, Maria Angelica Rangel, intensaun hato’o proposta ne’e tanba haree ba kondisaun eskola ne’ebé hahú a’at iha parte balun.

“La signifika ita la konsidera eskola seluk iha nasaun ne’e, maibé intensaun mak hakarak fó kondisaun dignu ba Eskola Fatumaca, tanba eskola ne’e forma ona rekursu umanu lubuk ida no balun ohin sai Deputadu no sai líder iha Forsa Armada nia laran,” Deputada Bankada Governu ne’e argumenta defende proposta, iha sala plenária, sesta ne’e.

Notísia relevante: Amo Locatelli husu Governu apoia subsídiu finanseira

Antes ne’e, Deputadu proponente sira rona preokupasaun Diretór Eskola Téknika Vokasionál Koléjiu Don Bosco Fatumaca, Padre Elísio Locatelli, ne’ebé aprezenta ona kondisaun eskola ba membru Governu tutela. 

“Tanba iha ona diskusaun entre responsável eskola no parte Governu, ami husu ita-boot sira bele konsidera ami-nia proposta hodi tau orsamentu $100.000 ba Eskola Fatumaca, atu ita-nia oan sira bele ba apreende ho di’ak,” Deputada ne’e dehan.

Nune’e, bazeia ba proposta orsamentu hosi kategoria despeza transferénsia públika ba programa edukasaun no informasaun, dotasaun inisiál $1.919.798, husu alterasaun atu tau tan $100.000, ho nune’e dotasaun finál ba kategoria hamutuk $2.019.798.

Iha biban hanesan, Ministru Edukasaun Juventude no Desportu, Armindo Maia, agradese ba preokupasaun Deputadu sira kona-ba kondisaun eskola.

“Ha’u rasik halo ona vizita ba Eskola Téknika Vokasionál Fatumaca no ha’u haree duni kondisaun eskola, ha’u sente presiza duni iha nesesidade balun atu apoiu tanba fasilidade sira ne’ebé uza daudaun ne’e kuaze hosi tempu portugeza nian,” governante ne’e dehan.

Jornalista : Tomé Amado

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here