Deputadu sira iha Parlamentu Nasionál aprova orsamentu iha debate no votasaun OJE 2022 iha sala plenária Parlamentu Nasionál, sesta (10/12/2021). Imajen TATOLI/Antonio Gonçalves.

DILI, 10 dezembru 2021 (TATOLI)—Deputadu sira iha Parlamentu Nasionál, sesta ne’e aprova proposta lei Orsamentu Jerál Estadu (OJE) 2022 montante $6,480,851 ba Ministéiru Planu no Ordenamentu (MPO) iha debate espesialiadade ho rezultadu votasaun a-favór 45, kontra 0 no abstensaun 19.

“Ho ida-ne’e, Orsamentu Jerál Estadu Ministéiru Planu no Ordenamentu pasa,” Prezidente Parlamentu Nasionál, Deputadu Aniceto Longuinhos Guterres Lopes, deklara iha plenária Parlamentu Nasionál.

Iha diskusaun ne’e aprezenta mós proposta ida ho númeru 70 husu aumenta adisionál $3,000,000 ho ninia pedidu justifikasaun halo estudu viabilidade ba konstrusaun barajen no bee-moos.

Proposta ne’e mai hosi proponent deputadu Mariano Assanami Sabino, Lidia Martins, António Benevides ho Francisco David Xavier Carlos, ne’ebé konsidera importante tebes atu kontinua halo estudu detalla barajen ne’ebé la’o ona, nune’e kontinua ba konstrusaun hodi dezenvolve bee-moos ida sustentavel.

Ministru Planu no Ordenamentu (MPO), José Reis, hateten orsamentu ba ida-ne’e prevee ona iha fundu infraestrutura, nue’e la aseita ho proposta ne’e no proponente sira deside retira fila-fali proposta refere.

Orsamentu tinan 2022 ne’e, aloka ba saláriu vensimentu $856,731, bens servisu $3,790,780, kapitál menór $832,340, kapitál dezenvolvimentu $801,000 no transferensia públika $200,000, no hosi orsamentu ne’e finansia programa tolu, sub-programa 10 no atividade 27.

Programa Boa-governasaun no jestuan instituisionál sei gasta $3,624,138, programa igualidade jéneru no inkluzaun sosiál sei gasta $63,248 no programa ordenamentu territóriu sei gasta $2,793,465.

Programa boa-governasaun no jestaun instituisionál ho sub-programa koordenasaun estratéjia dezenvolvimentu integradu médiu longu prazu ninia atividade mak reforsa servisu sentru planeamentu integradu garante funsionamentu no ezekusaun ho planeamentu integradu no rasionalizasaun rekursu finanseiru disponivél ho apoiu tékniku espesialista nesesáriu.

Iinklui prospektivu no ekonomista, akonpañamentu projeitu estratéjiku no elaborasaun estudu no pareser kona-ba área prioritáriu investimentu, atividade lidera prosesu reajustamentu prosesu PED, inklui elaborasaun planu implementasaun médiu no longu prazu ho estimativa kustu.

No atividade estabelese unidade jestaun projetu Cabo Fibra Ótika ba ligasaun TL liuhosi cabo internasionál fibra óptika, hala’o no fasilita reuniaun ba planu no estratéjiku investimentu no área seluk.

Sub-programa koordena no avalia atividade órgaun no servisu ministéiru ho atividade apoiu ministru iha exersísiu funsaun, presta apoiu tékniku-jurídiku ba ministériu.

Sub-programa koordena ezekusaun infaestrutura estratéjiku ho atividade formasaun ba funsionáriu jere servisu administrativu apoia koordenasaun, implementasaun ba projeitu cabo submarinho Fibra óptika, monitorizaun projetu estratéjiku.

Sub-programa boa-governasaun ho nia atividade rua, sub-programa jestaun instituisionál ho atividade haat.

Enkuantu, programa igualidade jéneru no inkluzaun sosiál ho sub-programa deklarasaun Maubessi nia atividade asegura lideransa kontrusaun hosi feto simu tratamentu preferensiál iha prosessu solisitasaun projetu infra-estrutura Governu.

Purtantu, programa ordenamentu territóriu ho sub-programa dezenvolve polítika territorial ho ninia atividade presta apoiu tékniku iha área planeamentu ordenamentu territoriál, koordena apoiu dirasaun nasionál.

Sub-programa dezenvolvimentu no koordenasaun ezekusaun instrumentu planeamentu urbanu ho nia atividade dezenvolve estudu apoiu hosi planeamentu urbanu, dezenvolve no konsolida instrumentu planeamentu urbanu, presta apoiu administrativu lojístiku ho tékniku.

Sub-programa asegura planea no polítika nasionál ordenamentu territóriu no dezenvolvimentu territóriu ho atividade mak dezenvolve estudu apoiu ba planeamentu territoriál, dezenvolve no konsolida instruentu planeamentu nasionál no munisipál, presta apoiu administrativu lojístiku no tékniku ba Diresaun Nasionál Ordenamentu Espasiál.

Sub-programa promove no difundir informasaun geográfika ho kartográfika ho atividade rekolla organiza jere, prodúz no desimina informasaun geoespasiál, geodésika no kartográfika, atividade instala no opera Sentru Nasionál Informasaun Geoespasiál, atividade presta apoiu administrativu lojístika no tékniku ba Diresaun Nasionál dadus Geoespasiais.

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here