Deputadu sira aprova proposta iha debate no votasaun faze espesialidade, iha sala plenária Parlamentu Naasionál, sesta (10/12). Imajen TATOLI/António Gonçalves

DILI, 10 dezembru 2021 (TATOLI)- Parlamentu Nasionál liuhosi diskusaun proposta lei Orsamentu Jerál Estadu (OJE) 2022 aprova $92,659,660 ba Ministéiru Asuntu Kombatente Libertasaun Nasionál (MAKLN) ho rezultadu votasaun a-favór 48, kontra 0 no abstensaun 17.

“Nune’e Orsamentu Jerál Estadu ba Ministéiru Asuntu Kombatente Libertasaun Nasionál pasa,” Prezidente Parlamentu Nasionál, Deputadu Aniceto Longuinhos Guterres Lopes, deklara liu hosi plenária, sesta ne’e.

Iha dsikusaun ne’e, Parlamentu Nasionál mós aprova proposta númeru 152 ba alterasaun orsamentu $2,610,000 hodi hala’o konstrusaun simetériu espesiál no momunentu ba saudozu sira-ne’ebé mata iha funu laran.

Proposta ne’e, títulu (Servisu/Órgaun) MAKLN kategória despeza kapitál dezenvolvimentu ho programa kódiku 980 kona-ba igualidade jéneru no inkluzaun sosiál, dotasaun inisiál $2,610,000 ho alterasaun hasai hosi montante ne’e tau fali nafatin ba títulu MAKLN ho kategória transferénsia públika no programa hanesan.

Justifikasaun proponente sira katak mantein montante orsamentu hodi uza kontrusaun simetéru espesiál no momunentu ba konbantente, veternu ho martir libertasaun nasionál. Proposta ne’e mai hosi Francisco de Vasconselo no Noé da Silva ‘Buka Tuir’.

Iha orsamentu tinan 2022 ne’e, MAKLN prevee $99,684,114 ne’ebé aloka ba saláriu vensimentu $731,126, bens servisu $3,580,128, kapitál menór $103,200, kapitál dezenovimentu $2,610,000 no transferénsia públika $92,659,660.

Orsamentu ne’e finansia programa rua (2), sub-programa neen, atividade 11, inklui montante $92,659,660 destina ba pagamentu pensaun ba kombantente libertasaun nasionál ne’ebé rejistadu, enkuantu orsamentu ne’e destina hosi transferénsia públika.

Programa boa-governasaun no jestaun instituisionál sei gasta $2,438,701 no programa igulaidade jéneru no inkluzasaun sosiál.

Programa boa-governasaun no jestaun instituisionál ho nia sub-programa rua (2) no atividade neen (6).

Programa igulaidade jéneru no inkluzasaun sosiál ho nia objetivu médiu prazu kombatente no respeita família hodi valoriza no apoia.

Nia sub-programa rekuiñesimentu no valorizasaun luta libertasaun nasionál nia atividade rekuñesimentu no valorizasaun veteranu, kombatente no martír libertasaun nasionál, atividade funsionamentu atividade konsellu kombatente libertasaun nasionál.

Sub-programa protesaun sosiál ba kombatente ho nia atividade mak asegura protesaun sosiál ba kombatente.

Sub-programa Infraestrutura ho nia atividade mak konstrusaun monumentu no simetériu espesiál ba veteranu, kombatente no martír libertasaun nasionál.

Sub-programa bolsa estudu ho nia atividadade atribuisaun bolsa estudu ba kombante libertasaun nasionál nia oan sira.

Jornalista : Nelson de Sousa

Editór       : Cancio Ximenes

PUBLISIDADEiklan