Deputadu sira aprova orsamentu ministériu iha debate no votasaun faze espesialidade, iha sala plenária Parlamentu Naasionál, sesta (10/12). Imajen TATOLI/António Gonçalves

DILI, 10 dezembru 2021 (TATOLI)—Reprezentante povu iha uma fukun Parlamentu Nasionál liuhosi diskusaun espesialidade ba proposta lei Orsamentu Jerál Estadu (OJE) 2022 ba Ministéiru Agrikultura no Peska (MAP) montante $21,400,322 ho rezultadu votasaun a-favór 45, kontra 0  no abstensaun 15.

“Nune’e, Orsamentu Jerál Estadu ba Ministéiru Agrikultura no Peskas (MAP) pasa,” Prezidente Parlamentu Nasionál, Deputadu Aniceto Longuinhos Guterres Lopes, deklara liuhosi plenária iha Parlamentu Nasionál, sesta ne’e.

Orsamentu ba tinan 2022 ne’e, aloka ba saláriu vensimentu $5,064,400, bens servisu $10,354,627, kapitál menór $3,881,175, kapitál dezenvolvimentu $1,705,120 no transférensia públika $395,000.

Programa boa-governasaun no jestaun instituisionál sei gasta $13,016,940 no programa agrikultura sei gasta $8,383,382.

Programa agrikultura ho nia objetivu sustentavél aumenta produsaun no produtividade iha sub-setór espesífiku agrikultura, ortikultura, pekuária, peska ba efisiénsia mellora kompetividade.

Ho nia sub-programa forsa traballu ba prestasaun servisu iha terrenu, sub-programa aumenta sustentavél produsaun planta industriál ho nia atividade estabelesimentu agrikultura integradu iha área pontensiál, atividade dezenvolve no mellora ortikultura komunitária, atividade subsídiu agrikultór, apoiu kultivu hodi promove prátika di’ak agrikultura, mobiliza grupu agrikultór no efetividade, efikasia utiliza makina agrikula apropriadu, apoiu inisiativa grupu joven feto no mane.

No reabilitasaun expande diversifika no intensifika produsaun plantasaun kafé, operasionaliza sentru viveiru planta industrial, no iha mós sub-programa aumenta sustentavél produsaun animal.

Sub-programa dezenvolvimentou infraestrutura ho nia atividade dezenvolve infraestrutura akuakultura no operasionaliza sentru viveiru ikan, konstrusaun barreira, armazenamentu iha Matadouro nasionál no Tibar, konstrusaun barreira protesaun no normalizasaun zona agríkula Bebui Uatulari, manutensaun irrigasaun Maliana I, Maliana II, Mautalo, Marco, Atabae Loes, Lotan, Caraulun, Oebaba, Raibere, Laclo, Buluto, Bebui, Saketo, Belia, Kumoli, Waibati no  Larisula no konstrusaun kanál prinsipál no sekundária Ramaskora no irrigasaun Oebaba.

Sub-programa aumenta sustentavél pordusaun no produtividade ba hahán no protudu ortikultura mak implementa armazenamentu no prosessamentu pós-kolleta ba apoiu grupu agrikultór.

Sub-programa transforma eskola ensinu tékniku agrikula ho profisional orienta ba auto empregu no merkadu traballu ho nia atividade kapasitasaun ba manorin na’in ba eskola Natarbora no sira seluk.

Sub-programa aumenta sustentavél produsaun peskeira no akuakultura mak dezenvolve indústria no laboratóriu peska, dezenvolve produsaun ikan tilápia, kriasaun ba ikan no sira seluk.

Sub-programa konservasaun no jestaun rekursu naturál ho nia atividade dezenvolve paisajen mantein jardin botániku, estabelese liña perímetru provizóriu no permanente iha área protejidu, proteje floresta, dezenvolve sistema agro-floresta, operasionaliza sentru viveiru floresta no ai-parapa, dezenvolve no manutensaun poténsia eko-turizmu iha área protejidu.

Sub-programa dezenvolvimentu infraestrutura mak hanesan promove investimentu setór Floresta hanesan ai-kameli, ai-teka, mahoni, saria, bambu no seluk tán.

Entretantu, programa boa-governasaun no jestaun instituisionál ho sub-programa rua no atividade ualu.

Aleinde ne’e, PN aprova mós proposta rua ne’ebé aprezenta hosi proponente António Nobre Tilman, Elbina Sousa no Lidia Martins.

Proposta númeru 76 adisionál $550.000 hodi aumenta sosa fini sira hanesan batar, modo, foos, haree ho tan fini seluk hodi aumenta produsaun iha rai-laran. Orsamentu ne’e sei tau iha programa ho kódiku 797 kona-ba agrikultura, despeza bens servisu.

No proposta númeru 78 husu adisionál $500.000 hodi halo konstrusaun moru, kanalizasaun bee-mos ho kazerna ba funsionáriu tékniku INPA Maubara ne’ebé osan ne’e sei tau iha programa kódiku 797 kona-ba agrikultura, despeza kapitál dezenvolvimentu.

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here