Espozisaun produtu lokál iha postu administrativu Viqueque villa, sesta (10/12). Imajen TATOLI/Vitorino Lopes da Costa

VIQUEQUE, 10 dezembru 2021 (TATOLI)—Kada tinan iha loron 16 outubru, país sira komemora loron mundiál ba ai-han, tanba ne’e iha sesta ne’e, Administrasaun munisípiu Viqueque realiza espozisaun hodi aprezenta produtu lokál.

“Ohin ita komemora loron ai-han mundiál ne’ebé ita realiza espozisaun ba ita-nia grupu agrikultór sira ne’ebé eziste iha munisípiu Viqueque hodi aprezenta produtu lokál,” Prezidente Komisaun Organizadora no atuál Diretór Ministériu Agrikultura no Peska (MAP) Viqueque, Carlos Pinto, hateten ba Agência TATOLI, iha postu administrativu Viqueque villa.

Objetivu realiza atividade ne’e atu motiva grupu agrikultór sira no aprezenta produtu lokál ne’ebé eziste iha Viqueque hanesan mina virjen, foremungu, batar, fore, foos rai, chokolate, foretali no seluk tan.

Aleinde ne’e, iha mós aprezentasaun tein ai-han ho produtu lokál no halo sertame ba grupu agrikultór.

Tuir responsável eventu ne’e, atividade ne’e hodi dezenvolve liután produtu lokál ba sosiadade tomak no enkoraja grupu agrikultór hasa’e produtividade.

“Ita propoin orsamentu ba munisípiu Viqueque $3.000 no hetan apoiu hosi Diresaun Nasionál Ai-han $1.950, ne’ebé iha tinan ne’e ita hetan fundu ba realizasaun atividade hamutuk $4.950,” nia akresenta.

Iha fatin hanesan, Diretór Nasionál Ai-han MAP, Rofino Soares Gusmão, hateten, iha tinan ne’e munsípiu hotu komemora loron mundiál ai-han, maibé Dili mak lae tanba situasaun COVID-19.

“Produtu barak maka eziste iha ita-nia rain, maibé ema barak maka seidauk koñese, tanba ne’e aproveita eventu ne’e hodi promove produtu lokál,” nia akresenta.

Nune’e, MAP kontinua promove ai-han nutritivu hodi ema bele koñese no iha tempu hanesan bele redús problema má nutrisaun iha rai-laran.

Atividade ne’e envolve grupu agrikultór hanesan Rahanas, Bahalara Uain, Tane Malu, Carauballu, Jesoria, Galiha no Haburas Feto.

Jornalista :  Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here