Ilustrasaun hosi google.

BOBONARO, 09 dezembru 2021 (TATOLI) – Ministériu Saúde (MS) rejista ema na’in-234 mak mate ona tanba durante tinan naruk enfrenta Human immunodeficiency virus infection and acquired immunodeficiency syndrome (HIV/AIDS).

“Tuir ita-nia dadus dezde 2003 mai to’o fulan-novembru nia laran ita deteta kazu komulativu HIV/SIDA hamutuk 1.464. Hosi númeru ne’e na’in-243 mak mate ona, agora sei falta 1.230 mak  moris hela ho moras ne’e,” Diretora Nasionál Kontrola Moras Ministériu Saúde, Clarinha João, ko’alia salaun PDHJ Bobonaro, kinta ne’e.

Hosi númeru ne’e mós na’in-719 mak ativu halo tratamentu no na’in-511 husik hela sira-nia tratamentu.

Hosi dadus ne’ebé fó-sai hosi Ministériu Saúde ne’e hatudu katak munisípiu Dili mak sei kontinua okupa númeru dahuluk kazu HIV/SIDA ho totál 1.056, Bobonaro 103 maibé kazu 20 mak halai hosi tratamentu no numeru kiikliu Aileu.

Diretora Clarinha João fó-sai kestaun ne’e iha ámbitu semináriu nasionál ho relizioju sira no entidade relevante munisípiu Bobonaro kona-ba métodu prevensaun ne’ebé seguru no saudável ba moras hada’et hosi relasaun seksuál no HIV transmisaun seksuál nune’e hamosu kompreensaun mútua ba prevensaun.

Enkuantu hahú hosi janeiru to’o fulan-setembu 2021 Ministériu Saúde serbisu hamutuk ho Organizasaun Naun Governamental (ONG) Estrela+ iha baze konsege deteta ema-ne’ebé moras hada’et liuhosi relasaun seksuál rihun-sia, maibé hosi númeru rezultadu teste laboratóriu na’in-hitu mak pozitivu HIV/SIDA.

“Dadus ne’e hatudu katak kazu ne’e barakliu mak ema-ne’ebé halo relasaun ho ninia parseiru mak afetadu maka’as, duké ema-ne’ebé halo seksuál worker ka fa’an seksu sira, tanba ita-nia komunidade sira prátika relasaun seksual ne’ebé la seguru, hanesan halo seksuál troka-troka no la uza kondom,” nia akresenta.

Atu redús numeru infetadu moras HIV/SIDA métodu prevensaun mak tenke abtinénsia, fiél ba parseiru no uza kondom bainhira halo relasaun seksuál la’ós ho parseiru.

Entretantu, Sekretáriu Ezekutiva Komisaun Nasionál Kombate HIV/SIDA, Atanásio de Jesus, hatutan, kada tinan kazu HIV/SIDA kontinua rejista tanba komunidade sira laiha konsiénsia no menus koñesimentu kona-ba relasaun seksuál seguru.

“Ida-ne’e akontese ba iha joven, mais barak mós mai hosi katuas sira, tanba dalaruma osan barak gosta halo buat-hotu tún sa’e, la hatene ida-ne’e seguru ka lae. Ne’e duni ha’u husu ba ita-nia komunidade atu halo relasaun seksuál karik tenke ho ita-nia parseiru, karik ho ema seluk uza komdom, atu nune’e moras ne’e labele hada’et fali ba ita-nia família,” nia fó hanoin.

Diretota Ezekutiva Estrela+, Ines Sarmento Lopes, esplika objetivu semináriu ne’e atu rona prespetiva hosi líder relijiozu sira no entidade relavante sira iha Bobonaro, tau opinaun hamutuk hodi rezolve lákuna ne’ebé akontese durante ne’e liga ho pasiente ne’ebé lakon hosi tratamentu no la hetan tratamentu saude.

Bazea ba rezultadu peskiza ne’ebé Estrela+ hala’o katak, grupu risku barak mak halai hosi tratamentu no balun  lakohi asesu ba tratamentu tanba sempre hetan  estígma no diskriminasaun iha sosiedade nia leet.

“Ida-ne’e afeta maka’as ba grupu xave sira iha aspeitu saúde no justisa legál, susar atu asesu ba informasaun, edukasaun formál, oportunidade serbisu no atu hetan tratamentu saude,” nia hateten.

Programa ne’e ONG estrela+ serbisu hamutuk Provedoria Direitu Humanu no Justisa no apoia másimu hosi Ministériu Saude no  Rejionál Fundu Globál liuhosi programa apoiu serbisu sustentavilidade HIV/SIDA ba populasaun xave iha Ázia.

Jornalista         : Sérgio da Cruz

Editor               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here