Ministru Obra Públika, Salvador Eugênio Soares dos Reis Pires, hato’o diskursu iha konferénsia nasionál datoluk kona-ba bee, saneamento no ijene, iha salaun CNE, sesta (10/12). Imajen TATOLI/Egas Cristóvão

DILI, 10 dezembru 2021 (TATOLI)—Ministériu Obra Públika (MOP) liuhosi Autoridade Nasionál Água no Saneamentu Institutu Públiku (ANAS, I.P) realiza konferénsia nasionál ba datoluk kona-ba Bee, Saneamentu no Ijene (BESI) ho tema ‘dalan asesu bee no saneamentu ne’ebé seguru, asesível no sustentável ba ema hotu iha ámbitu surtu COVID-19’.

Ministru Obra Públika, Salvador Eugênio Soares dos Reis Pires. Imajen TATOLI/Egas Cristóvão

“Objetivu konferénsia nasionál ne’e atu konsolida esforsu no hanoin ba setór BESI hanesan dezafíu, inovasaun, no teknolojia ne’ebé ita bele tau hodi formaliza planu asaun no mós meta ruma nu’udar esforsu ida, atu realiza kompromisiu ba Objetivu Dezenvolvimentu Sustensável (ODS) númeru neen, kona-ba fornese bee no saneamentu sustentável ba komunidade,” Ministru Obras Públika, Salvador Eugênio Soares dos Reis Pires, hateten, iha Salaun Conselho Nacional de Eleições (CNE), Caicoli, sesta ne’e.

Notísia relevante: ANAS, I.P planeia hadi’a sistema abastamentu bee-moos ba komunidade

Tuir Ministru, vizaun VIII Governu atu dezenvolve setór BESI, tanba durante ne’e halo ona esforsu maibé seidauk másimu atinje mehi ne’ebé Timor-Leste hakarak hanesan fornesementu bee no sanemanetu báziku sustentável.

“Iha tinan 2016 bainhira mosu ODS, liuhosi VI Governu kompremete ba Nasaun Unida katak Timor-Leste hakarak halo esforsu tomak atu atinje ODS númeru neen,” nia nia akresenta.

Ministru Obra Públika, Salvador Eugênio Soares dos Reis Pires, hasai foto hamutuk ho entidade relevante iha ámbitu konferénsia nasionál datoluk kona-ba bee, saneamento no ijene, iha salaun CNE, sesta (10/12). Imajen TATOLI/Egas Cristóvão

Nune’e, atu atinje meta ne’ebé define, Governu iha pontu prinsipál rua hanesan investimentu ba setór dezenvolvimentu instituisionál, ne’ebé halo reforma no fízika tenke halo investimentu atu hadi’a sistema bee no seluk tan.

“Ba dezenvolvimentu instituisonál, Governu halo analiza dezafiu sira iha setór BESI, hanesan Diresaun Jerál Água no Saneamentu (DGAS, sigla portugés) hanesan ajénsia ne’ebé tenke hakruk ba sistema burokrasia saida de’it, tanba ne’e VIII Governu deside transforma ba Bee Timor-Leste, Empreza Públika (BTL, E.P) no harii ANAS, I.P ho objetivu entidade rua ne’e bele hamutuk ho parseiru dezenvolvimentu sira asegura polítika Governu hodi bele atinje meta ODS,” governante ne’e subliña.

Maski nune’e, bee-moos kontinua nafatin sai preokupasaun ba komunidade iha territóriu tomak, liuliu iha kapitál Dili, tanba ne’e Governu iha ona polítika ba longu no kurtu prazu.

Ba kurtu prazu, BTL, E.P liuhosi unidade, halo manutensaun no nafatin halo esforsu hadi’a instalasaun ezistente hosi tempu Indonézia, Portugál, to’o mai indepedénsia ho komplikadu.

Aleinde ne’e, iha ona planu sistema bee integradu ba munisípiu Dili ne’ebé kuaze konklui ona, tanba ne’e daudaun halo negósiu liuhosi Ministériu Finansa ho parseiru sira atubele finansia hodi halo investimentu sistema bee integradu iha munisípiu Dili.

Governu prevee millaun $36 iha tinan ne’e ba bee-moos

Orsamentu ba bee-moos tinan ne’e Governu prevee milliaun $36 no ba tinan oin sei prevee tan milliaun $17, ne’ebé hosi orsamentu ne’e sei halo manutensaun no investimentu seluk ne’ebé presiza halo, nune’e bele oferese bee ba komunidade.

“Ha’u hanoin BTL, E.P hanesan empreza seidauk to’o tinan-ida, maibé sira esforsu maka’as atu estabele sistema korporativu, rekrutamentu rekursu umanu no seluk tan, ha’u fiar katak bainhira estabelesidu ona ita-nia fornesementu ne’e sei la’o di’ak liutan,” Ministru otimista.

Notísia relevante: MOP investe millaun $36 tinan ne’e ba meta ODS 6 bee-moos

Iha parte ne’e, sei fó tempu ba BTL, E.P atu forma ekipa tanba tuir planu analiza ekonómika, setór empreza públika atu sustentável presiza tinan-lima ka tinan-sanulu.

“Governu tenke kontinua investe iha infraestrutura fízika atubele hetan rendimentu sufisiente atu sustenta kustu operasaun, tanba ita-nia vizaun mak liu tinan-lima ka sanulu la husu ona osan ba Governu, maibé tenke sustenta rasik-an hosi fornesimentu servisu bee-moos no saneamentu báziku ba kliente sira,” nia subliña.

Koordenadór Steering Committee Plataforma Nasionál Bee-moos, Saneamentu no Ijiene Timor-Leste, Koko Valentin. Imajen TATOLI/Egas Cristóvão

Iha biban hanesan, Koordenadór Steering Committee Plataforma Nasionál Bee-moos, Saneamentu no Ijiene Timor-Leste, Koko Valentin, hateten, atividade ne’e hodi halibur parte hotu hodi diskuti asuntu nasionál relasiona dezafiu liga ho setór bee no saneamentu.

“Timor-Leste kontinua hasoru dezafiu relasiona ho investimentu no hasoru kresimentu populasaun kada tinan no ameasa COVID-19, tanba ne’e alvu ba polítika nasionál saneamentu báziku ne’ebé la’o ho meta 2020 seidauk atinje,” nia dehan.

Koordenadór ne’e observa mós katak, Timor-Leste hanesan illa ne’ebé hetan ameasa maka’as hosi impaktu alterasaun klimátika inklui dezafiu seluk hanesan má-nutrisaun ne’ebé fó ameasa ba labarik.

Konferénsia nasionál ne’e hetan apoiu hosi parseiru dezenvolvimentu sira hanesan, Austrália Aid, Water Aid, United Nations Children’s Fund (UNICEF), Plan Internasionál, Care Internasionál, no parseiru seluk tan.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here