Komunidade suku Hataz, postu administrativu Atabae,munisípiu Bobonaro dudu hela karreta kamioneta no aguna ne'ebe patina. Imajen espesiál.

BOBONARO, 10 dezembru 2021 (TATOLI) – Kondisaun estrada ligasaun suku Hataz ba suku Aidabaleten, difikulta konstrusaun Uma Kbiit Laek (UKL) unidade tolu iha aldeia Alvu, suku Hataz, postu administrativu Atabae, munisípiu Bobonaro.

Xefe suku Hataz, Diamantino dos Santos, infiorma, bainhira akontese udan la permite kompañia fornesedór sira distribui materiál ba to’o suku tanba iha dalan-ninin laiha dreinazen nune’e udan been-sulin tama hotu ba estrada laran halo tahu-dodok nakonu no kois.

“Problema ne’e horisehik ha’u aprezenta tiha ba postu Atabae, agora UKL ne’e foin atinje 70%, entaun udan hanesan ne’e atu mobliza materiál mak susar tanba tahu-metin karreta tama-mai la di’ak, atu sai mós la di’ak, ida-ne’e mak sai difikuldade boot mai ami,” Xefe suku Hataz informa ba Agência Tatoli, iha Maliana, sesta ne’e.

Nia husu Governu halo intervensaun emerjénsia nune’e projetu ne’e finaliza tuir durasaun kontratu tanba agora materiál konstrusaun iha terrenu hahú menus.

Problema kondisaun estrada ne’e xefe suku aprezenta proposta direitamente ba Ministériu Obra Publika (MOP), no ministru rasik iha fulan kotuk ba haree direitamente ona ho matán, maibé até agora seidauk iha rezultadu atu rezolve.

”Ne’e duni ha’u husu ba ministériu kompetente atu orienta IJE mai halo normalizasaun estrada ne’e, atubele fasilita ita-nia komunidade sira ba-mai, sé la udan hanesan ami komunidade sira metin iha fatin de’it, labele halo buat ida,” xefe suku ne’e halerik.

Octavio Paulo Xavier nu’udar komunidade Hataz, informa kondisaun estrada ne’e difikulta tebes atu asesu ba merkadu Atabae Vila no Maliana.

“Iha-ne’e ami komunidade sira maoria moris ho vida agrikultór mak kuda hare, batar, fehuk, talas, modo, brinjela, tomate, ai-fuan, maibé udan hanesan ne’e ita labele lori ba merkadu tanba atu ultrapasa de’it estrada mós susar la halimar, entaun produtu sira-ne’e ita haan de’it no troka malu ho sasán seluk,” nia dehan.

Kondisaun estrada ne’ebé mós afeta ba inan isin-rua sira bainhira kanotak moras tanba difisil atu transporta hosi postu saude Hataz ba Hospital Referál Maliana hodi hetan tratamentu saúde emerjénsia.

Entretantu, suku Hataz iha uma-ka’in 678 ho totál populasaun 3.308 komposta hosi aldeia haat mak hanesan, Hataz, Boloi, Aidabaslala no Aidabaleten.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here