Diretóra JSMP, Ana Paula Marçal. Imajen/Domingos Piedade.

DILI, 10 dezembru (TATOLI)— Diretora Ezekutivu Programa Monistorizasaun Sistema Judisiál (JSMP), Ana Paula Marçal, hateten, durante ne’e Defensoria Públiku hasoru dezafiu atu fó asisténsia legál no akompañamentu ba nia kliente sira tanba menus rekursu umanu no laiha transporte

“Ami nian monitorizasaun, durante ne’e ba defensoria públiku sira hala’o duni sira nian serbisu tuir papél ne’ebé maka iha, maibé ho dezafiu ne’ebé maka sira hasoru liuliu menus rekursu umanu no fasilidade hanesan transporte ,” Diretora Ezekutiva JSPM ne’e, hateten ba Agência TATOLI iha nia kna’ar fatin Colmera, sesta ne’e.

JSMP mós monitoriza kona-ba rekursu umanu iha defensoria públiku hamuttuk 33 no fasilidade trasporte hanesan karreta ne’ebé ho kondisaun la sufisiente atu halo movimentu akompaña kliente sira.

Tuir relatóriu JSMP iha tinan 2021 hatudu 50% defesoria públiku ladun akompaña no ladun vizita nia kliente iha prizaun tanba rekursu limitadu. Enkuantu kada defesór públiku bele kaer kazu 11 depende ba tempu.

“Rekursu umanu no fasilidade fó difikuldade tebes ba sira nia serbisu hodi ladun akompaña no vizita sira nia kliente iha prizaun. Maibé ho defesór públiku balun hahú muda sira nia karakter hodi halo akompañamentu no akonselamentu ba sira nian kliente prizaun, maski infreta situasaun defisil,” nia akresenta.

Nune’e, Diretora Ana Paula husu ba Governu liuhosi Ministériu Justisa atu investe makas iha Sentru Formasaun Judisiáriu atubele aumeta rekursu umanu iha defensoria públika atu garante direitu sidadaun asesu ba justisa.

JSMP mós rekomenda ba Ministériu Justisa iha Orsamentu Jerál Estadu tuir mai fó autónomia finanseiru ba Defesoria Públiku atubele jere rasik nian orsamentu.

“Ita sujere Defesoria Públika tenke iha autónomia finanseira atubele halo manutesaun ba sira nian fasilidade no aumenta rekursu umanu hodi mellora asisténsia legál ba sidadaun ne’ebé presiza,” Diretora ne’e rekomenda.

Defesoria Públika menús rekursu umanu

Entertantu, Defesór Públiku Jerál, Cancio Xavier, hateten, rejeita kona-ba defesór públiku ladun fó asisténsia legál ba ema sira ne’ebé presiza tulun.

Defensor Públiku Jerál, Câncio Xavier. Imajen Tatoli/Dok

“Maibé, ami menus duni rekursu umanu, tanba daudaun defensór na’in-29 mak ativu ne’ebé iha difikudade atu fó asisténsia juridiku ho másimu ba ema sira ne’ebé presiza tulun,” nia rekonese.

Tanba, Defesór píbliku ida kaer kazu 15 kada loron ida ne’ebé iha difikuldade tebes, maibé esforsu nafatin atu fó asisténsia legál ho extra-judisiál ba komunidade sira.

“Ami nia difikuldade mak laiha osan atu halo manutensau ba karreta sira tanba defensória públiku nia viatura lima, maibé avaria hotu ona. Dala ruma, ha’u maka oferese fali ha’u nia karreta ba funsionáriu sira ne’ebé hodi halo serbisu iha terrenu,” nia realsa.

Maski nune’e, Defensór Públiku Jerál ne’e kompromete la hamate serbisu defensoria públika nian ho fó asisténsia legál  ba públiku ho di’ak.

Notísia Relevante: Câncio Xavier Hetan Pose Hanesan Defensór Públiku Jerál

Jornalista : Natalino Costa

Editór       :  Florencio Miranda Ximenes

PUBLISIDADEiklan