Komandante Unidade Patrullamentu Fronteira (UPF), Superintendente Euclides Belo, hala’o vizita ba postu fronteira Saburai, Bobonaro. Imajen Tatoli/Sérgio da Cruz.

BOBONARO, 09 dezembru 2021 (TATOLI) – Unidade Patrullamentu Fronteira (UPF) lideradu Superintendente Euclides Bello, sei entrega joven na’in-tolu ne’ebé detein iha Batugade ba Komandu PNTL Munisípiu Bobonaro hodi submete ba prosesu investigasaun kontinuasaun.

Iha loron-kinta ne’e, Unidade Patrullamentu Fronteira (UPF) detein joven na’in-tolu, iha Kuartél UPF, Nu-badak, suku Batugade, postu administrativu Balibo, munisípiu Bobonaro.

Komandante Unidade Patrullamentu Fronteira, Superintendente Euclides Bello, informa joven hirak-ne’e na’in-rua mak lori karreta avanza kór metan ho xapa-matríkula A.18.781 ne’ebé deskonfia fasilita membru grupu arte-marsiál na’in-ida hakat ilegál fronteira hosi Indonézia mai Timor-Leste.

“Ohin, purvolta tuku 06:00 dadeersan ita-nia membru halo pasa-revista iha Fatuk-boot konsege prende karreta ida, depois ita halo fiskalizasaun pasa-revista ba karreta ne’e ita hetan atributu arte-marsiál hanesan; kalsa, faru, livru no sertifikadu, embora ida ita halo identifikasaun ba motorista na’in-ida no pasajeiru na’in-rua ne’ebe ita suspeita lori atributu arte-marsiál la ho dukumentu,” Euclides Belo, informa liuhosi telefónika.

Daudaun ne’e UPF halo ona identifikasaun ba sidadaun na’in-tolu ne’e no tuir planu sei entrega ba parte seksaun investigasaun kriminál munisípiu Bobonaro hodi halo prosesu imvestigasaun tuir prosedimentu legál hafoin submete ba Ministériu Públiku.

Iha fatin ketak,  UPF halo serbisu kordenada ho Komandu PNTL munisípiu Bobonaro konsege detein sidadaun na’in-ida iha área suku Holsa, postu administrativu Maliana ne’ebe tenta lori sigarru surya 12 slop 30 ho dalan ilegál.

Nune’e mós iha loron kuarta ne’e, UPF konsege detein sidadaun na’in-ida iha área Tunubibi, suku Tapo-Memo, postu administrativu Maliana, ne’ebé lori fogete ilegál modelu shoot ualu (8) hamutuk lolon 96 hosi Atambua mai Maliana.

“Relasiona ho kazu sira-ne’e mak ba oin UPF nafatin serbisu hamutuk ho komandu Bobonaro no COE, atu halo vijilánsia iha fatin risku sira hodi asegura lina fronteira seguru ba ema hotu,” nia subliña.

Komandante UPF ne’e apela ba komunidade sira iha liña fronteira atu labele halo atividade tranzaksaun ilegál iha fronteira terrestre entre Indonézia ho Timor-leste nune’e bele kontribui ba pás no establidade iha loron Natál ho tinan foun.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here