DILI, 09 dezembru 2021 (TATOLI)— Tuir dadus estatístika, hahú hosi novembru to’o dezembru, Servisu Saúde Munisípiu Dili (SSMD), rejista pasiente ho moras dengue hamutuk 70-resin.
“Iha fulan novembru, ita rejista 30-resin no mós iha meadu dezembru rejista tan 40-resin tanba udan komesa monu rai ne’e moras dengue sei aumenta makas ona,” Diretora Servisu Saúde Munisípiu Dili, Agostinha Segurado, hateten ba jornalista sira iha knaar fatin, kinta ne’e.
Hahú hosi janeiru to’o 08 dezembru 2021, SSMD rejista pasiente dengue hamutuk 502, hosi númeru ne’e na’in-rua mak mate.
“Husi kazu ne’e hotu resulta labarik na’in-rua mate, hanesan óbitu ida iha fulan juñu ho tinan rua no ida iha fulan outubru ho idade tinan tolu,” nia akresenta.
Iha tinan 2020, SMD rejista kazu dengue 807 no mate na’in-hitu, hosi kazu ne’e deteta distribuisaun postu Dom Aleixo hamutuk 200-resin, Kristu-Rei iha kazu 100-resin, Na’in Feto 71-resin, Vera Kruz iha kazu 50 resin no Atauro iha ida inklui Metianaru iha tolu.
Nune’e, SMD fó apoiu másimu ba komunidade iha área risku ba dengue atu kontinua hamoos lixu iha uma-oin no fatin públiku sira hodi prevene aan hosi moras ne’e.
“Ita haree kuandu udan tun iha fatin barak mak bee nalihun ne’ebé fó biban ba kazu dengue aumenta, kuandu laiha asaun koletiva hosi sidadaun hotu atu prevene aan hosi dengue,” nia akresenta.
Ministériu Saúde liuhosi SMD hahú haforsa sensibilizasaun atu hasa’e ema hotu nia konsénsia hamoos lixu no sei distribui aimoruk kimiku atu regra susuk sira iha bairru risku sira.
Jornalista : Felicidade Ximenes
Editór : Florencio Miranda Ximenes
