Koordenadór Administrasaun CVTC atribui sertifikadu ba estudante sira. Imajen Tatoli/Celestina Teles.

COVALIMA, 09 dezembru 2021 (TATOLI)—Sekretaria Estadu Formasaun Profisionál no Empregu (SEPFOPE), atribui sertifikadu ba estudante sira-ne’ebé tuir formasaun iha área administrasaun, hospitalidade no kursu komplemetar iha Canossa Vocasional Training Center (CVTC) Suai, Covalima durante tinan ida.

“Centru ida-ne’e, ita-nia joven sira iha Covalima hakarak partisipa iha formasaun ida-ne’e bazea ba esperiénsia ne’ebè mak iha formasaun ba joven sira importante,” Diretór Jerál Sekretáriu Estadu Formasaun Profisionál no Empregu (SEPFOPE), Paulo Alves, hateten liuhosi nia diskursu bainhira atribui sertifiladu ba estudante sira, iha salaun Parokia Nossa Senhora Suai, Covalima, kinta ne’e. 

Tanba, nia dehan, VIII Governu Konstituisionál kompromote tau prioridade ba formasaun liga ba nesesidade indústria tanba agora la haree ba valór maibe haree liu ba esperiénsia.

Governu fó prioridade ba programa fó formasaun ba joven sira bazea ba merkadu ne’ebè mak presiza maibé tinan ne’e osan uitoan loos entaun iha tinan oin ne’e, sentru formasaun balun sei la hetan ajudu. 

Aleinde ne’e, diretór ne’e sente triste tanba joven sira iha munisípiu Covalima menus tuir formasaun tanba realidade ne’ebé akontese iha Sentru Formasaun Claret Covalima ne’e, joven na’in-haat de’it mak tuir formasaun iha sentru refere. 

“Ha’u mos triste tanba joven sira iha Covalima menus tuir formasaun ne’ebè fasilita hosi SEPFOPE maibé joven sira hosi munisípiu seluk mak barak tuir formasaun iha Covalima,” nia informa.  

Ba juventude no estudante sira, nia apela bainhira juvemtude no estudante sira-nia mehi atu konkretiza tenke halo asaun tanba atu konkretiza mehi tenke esforsu la’ós milagre. 

“Ita-boot sira iha mehi atu sai realidade hodi halo asaun iha ita-boot sira-nia moris, bainhira mehi de’it milagre sei la mosu mai. Ho sertifikadu ne’ebè mak ita-boot sira hetan la’ós atu rai iha mala laran no atu aplika (aplay) ba vaga iha komisaun funsaun públiku (KFP),” nia hateten. 

Ditetór Canossa Vocasional Training Center (CVTC) Suai, Madre Cândida Castro Correia, FDCC, hato’o parabéns ba estudante sira-ne’ebè iha prontidaun atu tuir formasaun. 

Ita-boot sira iha prontidaun hodi partisipa iha formasaun iha área hospitalidade, administrasaun no kursu komplementar iha CVTC iha vontade atu aprende no aprende,” nia hateten. 

Estudante sira-ne’ebè ramata nia formasaun iha área administrasaun hamutuk na’in-18, Hospitalidade 26 no kursu komplementar na’in-tolu (3).

Reprezentante formandu sira iha área administrasaun, Isabel Maria, agradese ba SEFOPE hodi fasilita formasaun ba sira durante tinan ida nia laran.

“Ha’u hakarak dehan mundu bele muda kada minitu. Ohin, ami aumenta ami-nia abilidade (skill) hodi simu sertifikadu. Tinan bele liu, idade bele aumenta. prosesu aprende too ita mate mos aprende nafatin,” nia dehan.

Nia esplika, Estudante na’in-47 simu sertifikadu CVTC liuhosi esforsu ho mudansa globál ne’ebè iha no hodi hetan esperiénsia durante tinan ida iha sentru CVTC Suai Covalima.

Serimónia atribui sertifikadu ne’e partisipa hosi reprezentante Sekretáriu Estadu Formasaun Profisionál no Empregu (SEFOPE), Diretór Jerál Paulo Alves, diretora INDMO no estudante sira.

Jornalista : Celestina Teles

Editór       : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here