Pesóal saúde munisípiu Baucau partisipa formasaun kona-ba preparasaun kampaña vasinasaun Pfizer ba estudante sira iha salaun enkontru sentru saúde Riamare, kinta (09/12). Imajen Tatoli/Natalino Belo.

BAUCAU, 09 novembru 2021 (TATOLI) – Pesóal saúde sira iha munisípiu Baucau partisipa formasaun Pfizer molok implementa kampaña vasinasaun ba estudante iha fulan-janeiru 2022.

Diretór Servisu Saúde Baucau, Domingos Reinaldo da Costa Guterres, esplika, formasaun ne’e atu fahe informasaun ba xefe saúde hotu no responsável programa imunizasaun nune’e prepara-aan antes implementa kampaña vasinasaun Pfizer ba estudante sira iha janeiru 2022.

“Preparasaun ba tékniku sira atu kontinua ba postu administrativu sira nune’e bele iha koñesementu natoon atu kontinua kampaña vasinasaun Pfizer ba estudante sira iha munisípiu Baucau,” Diretór Servisu Saúde, ko’alia iha Baucau, kinta ne’e.

Formasaun refere partisipa hosi xefi sentru saúde sira, responsável vasinasaun iha sentru saúde, responsável hosi vijilánsia epidemiolojía.

Domingos hateten, parte saúde planeia atu direitamente fó vasina ba estudante sira iha ba kada eskola ne’ebé estabelese iha sentru saúde sira munisípiu Baucau maibé kolabora ho autoridade lokál hodi kontribui dadus labarik idade tinan 12-18 ne’ebé la asesu ba eskola.

“Pesóal saúde sira sei aproveita bainhira eskola realiza enkontru ho inan-aman estudante sira hodi fó advokasia no esplika kona-ba vasina Pfizer,” Domingos akresenta.

Formadór programa imunizasaun vasina pfizer, Caetano Gusmão, esplika, formasaun kona-ba oinsá bele prevene isin hasoru moras covid-19, asegura Pfizer iha jeleira kada fasilidade saúde atu konserva iha temperatura di’ak hosi 2-8 grau-selsiu nune’e mantein kualidade.

Vasinasaun Pfizer iha nasionál normalmente tenke asegura iha jeleira menus 80 grau-selsiu no bainhira transporta to’o iha sentru saúde tenke asegura ho temperatura 2-8 grau-serliu no durasaun uzu durante loron 31.

“Liuhosi formasaun ne’e atu pesóal saúde sira tenke uza ona iha oras neen bainhira atu vasina, sé lae afeta ba kualidade tanba kondisaun rai-manas,” Caetano informa.

Xefe sentru saúde Uailili, Arlindo dos Santos katak, matéria ne’ebé hetan hanesan orientasaun serbisu no sei kontinua fali informa ba pesóal saúde sira.

“Ami nu’udar tékniku profisionál tenke prontu kualkér tempu tanba liuhosi faze preparasaun hanesan dadus estudante sira submete ona iha saúde Baucau,” Arlindo hateten.

Munisípiu Baucau akumula sentru saúde sia (9) komposta hosi sentru saúde Uailili ho totál eskola hamutuk 16 ne’ebé akumula estudante na’in 1.702, sentru saúde Bucoli totál eskola neen (6) ho estudante na’in 1.341.

Nune’e mós sentru saúde Ria-mare totál estudante na’in 6.751 hosi eskola hamutuk 29, sentru saúde Baguia totál estudante 1.925 hosi eskola hamutuk 27, sentru saúde Laga totál estudante 3.051 hosi eskola 26.

Sentru saúde Quelicai totál estudante 2.417 hosi eskola 42, sentru saúde Vemasse totál estudante 925 hosi eskola hitu (7), sentru saúde Ossoqueli totál estudante hamutuk 715 hosi eskola neen (6) no sentru saúde Venilale totál estudante 2.471 hosi eskola 25.

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here