Komandu Falintil-Forsa Defeza Timor-Leste (F-FDTL) liuhosi ekipa médiku militár hala’o tratamentu saúde gratuita ba komunidade sira. Iha Aldeia Rai Fatuk, Suku Leolima, Postu Administrativu Balibo, kinta (09/12). Imajen Tatoli/Francisco Sony.

BOBONARO, 09 dezembru 2021 (TATOLI) – Komandu FALINTIL-Forsa Defeza Timor-Leste (F-FDTL) liuhosi Departamentu Saúde, realiza tratamentu saúde gratuita ba komunidade suku Leolima, postu adminitrativu Balibo, munisípiu Bobonaro.

Atividade ne’e realiza iha ámbitu ezersísiu militár ho naran ezersísiu Cobra 21-2, nune’e iha atividade ne’e tratamentu saúde gratuita ba komunidade mós nu’udar programa importante. 

“Iha ambitu ezersísiu Cobra 21-2 ne’e, médiku militár nia tarefa maka apoiu reál ba ezersísiu tomak, no apoiu fiksu ba ezersísiu ida-ne’e. Alende ne’e ajuda umanitária hanesan halo tratamentu iha fatin sira-ne’ebé identifika iha postu administrativu tolu, Maliana Vila, Balibo no Atabae,” Adjuntu Xefe Departamentu Médiku Saúde Militár, Kapitaun Manuel Mendes Pereira, iha sentru komunitáriu Leolima, kinta ne’e.

Atividade ne’e loron dahuluk hala’o ona iha Tunubibi, kuarta iha Moleana nune’e kinta ne’e iha Leolima.

Adjuntu Xefe Médiku Saúde Militár, Kapitaun Médiku Manuel Mendes Pereira. Imajen Tatoli/Francisco Sony.

Kapitaun Médiku Manuel Mendes Pereira reforsa, populasaun hamutuk 250-resin mak hetan tratamentu saúde  nomoos hala’o vasinasaun kontra moras Covid-19 hamutuk na’in 50-resin.

“Durantu loron rua-nian moras sira-ne’ebé mais frekuente maka moras infeksaun respiratória nomoos moras kulit ninian,” nia haktuir.

Xefe aldeia Rai Fatuk, Saturlino Maia informa, suku Leolima iha aldeia-haat, Rai Fatuk, Faturui, Dauderok no Bour.

“Durante ne’e komunidade sira halo tratamentu iha Balibo ka iha Maliana vila ho distánsia dook, dalaruma mota tún komunidade sira labele hakuur hodi halo tratamentu saúde. Entaun alternativu ba komunidade sira maka uza ai-moruk tradisionál atubele halo tratamentu ba sira-nian moras,” autoridade lokál ne’e haktuir. 

Xefi Aldeia Rai Fatuk, Suku Leolima Postu Adminitrativu Balibo, Saturlino Maia. Imajen Tatoli/Francisco Sony

Atoridade lokál ne’e agradese tanba foin dahuluk komunidade aldeia Rai Fatuk no Aldeia Bour hetan tramentu no fahe mós ai-moruk gratuita ba komunidade sira.

“Ho ida-ne’e ami agradese tebes, tanba maluk militár sira maske ho kondisaun estrada aat no mota boot sira halo tratamentu gratuita no oferese ai-moruk ba komunidade,” nia apresia.

Pesoál saúde sira-ne’ebé fó apoia ba atividade ne’e komposta hosi médiku na’in-haat no profisionál saúde na’in 14.  Biban ne’e, realiza mós kampaña vasinasaun kontra surtu COVID-19 ba komunidade iha suku refere.

Jornalista         : Francisco Sony

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here