Ró mariña hosi Estadu Unidu Amérika vizita Timor-Leste ho objetivu hala’o CARAT tinan 2021 ho forsa mariña Timor-Leste nian. Imajen Tatoli/Natalino Costa.

DILI, 08 dezembru (TATOLI) –  Xefe Estadu Maiór FALINTIL-Forsa Defeza Timor-Leste (F-FDTL), Brigadeiru Jenerál, Calisto dos Santos ‘Coliati’ konsidera ezersísiu Cooperation Afloat Readiness and Training  (CARAT) tinan 2021 hasa’e koñesimentu profisionál membru F-FDTL.

Brigadeiru Jererá Coliati dehan, CARAT nu’udar ezersísiu anuál iha kooperasaun téknika militár entre Timor-Leste no Estadu Unida Amérika.

“Ha’u nu’udar Xefe Estadu Maiór sente haksolok, liuliu ba komandu FALINTIL-FDTL sente haksolok, tanba ho prezensa ró sira hanesan ne’e bele ajuda atu aumenta koñesimentu profisionál, koñesimentu operasionál ba iha ita-nia forsa, liuliu  ba  ita-nia marineiru sira,” Xefe Estadu Maiór F-FDTL, Brigadeiru Jenerál Calisto dos Santos ‘Coliati’  ba jornalista sira bainhira partisipa serimónia abertura ezersísiu CARAT tinan 2021 entre forsa mariña Timor-Leste no forsa mariña Estadu Unida Amerika (EUA), ne’ebé hala’o iha portu Dili, kuarta ne’e.

Nia dehan, ró marineiru EUA nian ne’e moderna tebes ho fasilidade militár adekuadu no sufistikadu, haree hosi ezersisiu CARAT tinan ne’e forsa mariña Timor-Leste hetan koñesimentu durante hala’o ezersísiu.

Brigadeiru Jenerál Coliati husu Governu tau matan liuliu kona-ba orsamentu hodi profisionaliza forsa armada Timor-Leste nian.

“Ita-nia kondisaun forsa marineiru nian ne’e seidauk to’o, tanba ita foin hahú ita presiza hadi’a di’ak liután iha parte infraestrutura, rekursu umanu,  fasilidade,  ne’ebé presiza tulun hosi ita-nia Governu,”
 nia katak.

Enkarregadu Estadu Unidu Amérika (EUA) Tom Daley, sente kontente ba realizasaun ezersísiu CARAT tinan ida-ne’e, tanba ho ezersísiu sira hanesan ne’e bele hametin kooperasaun militar forsa EUA.

“Ha’u sente kontente tanba liuhosi ezersÍsiu militar ne’e bele hametin relasaun  forsa rai-rua nian,” dehan nia. Enkuantu ezersiusiu CARAT ne’e sei halao durante loron haat nia laran.

Jornalista         : Natalino Costa

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here