Lansamentu fundu adisional $1,5 millaun hodi timor-leste responde ba COVID-19. iha Palásiu Sinzas, Caicoli, kinta (09/12). Imajen TATOLI/Egas Cristóvão

DILI, 09 dezembru 2021 (TATOLI)— Estadu Unidu Amérika (EUA) liuhosi Ajénsia Estadu Unidu ba Dezelvolvimentu Internasionál (USAID,sigla Inglés) anúnsia subsidiu millaun $1,5 ba Fundu Nasaun Unida ba Labarik (UNICEF, sigla Inglés) hodi hatan ba COVID-19 iha Timor-Leste.

“Estadu Unidu Amérika (EUA) haksolok hodi hanaruk ka extende tan apoia adisionál milaun $1,5 kontra COVID-19. Apoia atu Timor-Leste kombate pandemia global ne’ebé afeta ba populasaun no apoia ne’e refleta mós kompromisiu EUA nian ba serbisu nivel globál hodi hakotu pandemia ida ne’e,’’ Enkarregadu Negosiu Embaixada Estadu Unidu Amérika (EUA), Tom Daley, hateten iha ámbitu lansamentu apoia fundu adisionál iha salaun Palasiu Sinzas, Caicoli, kinta ne’e.

Finansiamentu ne’e sei apoia kontinuasaun servisu ensensiál sira saúde maternal, neonatal no infantil iha país laran tomak, espande ba kampaña vasinasaun populasaun ilejivel sira, mellora prevensaun kontrolu infesaun liuhosi fornese ekipamentu protesaun pesoál adisionál ba sentru saúde komunitária 71 no postu saúde munisípiu 12 inklui Rejiaun Administrativu Espesiál Oé-Cusse no Ambeno (RAEOA) hodi promove hahalok prevensaun COVID-19.

Fundu adisionál ne’e, bazeia ba inisiativa konjunta hosi USAID no UNICEF mak benefisia ona ema 480.000 liuhosi melloramentu prevensaun kontrolu infesaun,  fornese asesu ba fasilidade bee, saneamentu no ijiene iha sentru saude komunitaria 20 iha munisipiu lima; atinje ema liu 650.000 liu hosi esforsu konsientizasaun hosi uma ba uma kona-ba prevensaun COVID-19 no ekipa sentru saúde komunitaria 15 ho prevensaun infesaun no kontrolu suprimentu sira hanesan ekipamentu fase liman portátil no suprimentu limpeza sira.

EUA ajuda ona Timor-Leste kombate COVID-19 hamutuk milaun $5,9 no fornese ona vasina Pfizer hamutuk 100,620-resin.

Iha biban hanesan, Reprezentante UNICEF iha Timor Leste, Bilal Durrani, hateten, ajénsia ne’e lidera ona apoia ba Governu Timor-Leste iha aspetu hotu hodi hatan ba COVID-19 hahú kedas loron dahuluk iha dezenvolvimentu operasionalizasaun no entrega planu nasionál distribuisaun vasina   ba programa kampaña vasinasaun.

“Ami-nia parseria ho USAID ajuda ema to’o ohin loron hamutuk miliaun 1,1 no finansiamentu ne’e ajuda hodi aumenta esforsu mellora prevensaun no kontrolu infensaun COVID-19 hodi garante labarik no inan sira kuida esensiál hodi salva nia moris,’’ nia akresenta.

Entretantu, Diretora Jerál Prestasaun Saúde, Ministériu Saúde, Odete da Silva Viegas, agradese ba apoia hosi EUA hodi hakbiit Timor-Leste luta kombate COVID-19.   

“Ho apoia EUA nia, ita mós haluan tan kampaña vasinasaun ba labarik idade tinan 12 to’o 18 mai kraik. Tanba orsamentu ne’e sei promove asaun hodi kontribui   ba hamenus impaktu COVID-19 liuhusi prevensaun  tratamentu no vasinasaun ba populasaun ilijível iha Timor Leste,’’Diretora Jerál ne’e agradese.

Notísia Relevante: EUA apoia ekipamentu protesaun pesoál COVID-19 ba MS

Jornalista   : Felicidade Ximenes

Editór         : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here