iklan

EDUKASAUN, HEADLINE

Estudante Tékniku Vokasionál na’in-38 laiha informasaun tuir ezame nasionál

Estudante Tékniku Vokasionál na’in-38 laiha informasaun tuir ezame nasionál

Eskola Ensinu Sekundáriu Tékniku Vokasionál, Becora. Imajen TATOLI/Nelia Fernandes.

DILI, 09 dezembru 2021 (TATOLI)—Maski iha loron 13 dezembru sei realiza ezame nasionál, maibé to’o agora estudante na’in-38 hosi eskola Tékniku Vokasionál tolu seidauk konfirma ho parte eskola katak sei tuir ezame.

Estudante hamutuk 648 hosi eskola Tékniku Vokasionál tolu iha Dili, preparadu ona tuir ezame nasionál tanba konklui ona ezame lokál ne’ebé kada eskola realiza no lista estudante submete ona ba Ministériu Edukasaun, Juventude no Deportu (MEJD), maibé to’o agora estudante 610 de’it mak marka prezensa iha eskola hodi konfirma atu partisipa iha ezame nasionál.

Tuir Diretór Eskola Ensinu Sekundáriu Tékniku Grupu Otelaria Turizmu Becora, Charles Guterres, estudante finalista ne’ebé atu tuir ezame nasionál iha 102, tanba livre ona hosi ezame modulares no partisipa ona iha formasaun kontestu traballu inklui ezame prova aptidaun profisionál.

“Hafoin kompleta rekizitu sira, to’o agora ha’u-nia estudante na’in-hitu seidauk mai foti kartaun ezame, ne’ebé tuir informasaun, iha estudante feto na’in-lima grávida no mane rua lakon paradeiru,” Diretór Eskola informa ba Agência TATOLI, iha iha Becora, kinta ne’e.

Notísia relevante: MEJD sei distribui pontu ezame nasionál iha loron 10 dezembru

Maski nune’e, parte eskola hein nafatin estudante sira-nia prezensa atubele tuir ezame, tanba ne’e direitu ikus ba sira-nia futuru.

“Se sira la marka prezensa to’o segunda, konserteza estudante finalista 93 de’it mak partisipa ezame nasionál,” nia akresenta.

Nune’e mós, Diretór Eskola Ensinu Sekundáriu Tékniku Vokasionál 28 novembru Becora, Pedro da Silva Ximenes, relata, iha estudante hamutuk 135 mak sei tuir ezame tanba prienxe ona rekizitu.

“Maibé estudante 109 mak marka ona prezensa hodi garante tuir ezame nasionál, enkuantu na’in-26 laiha informasaun to’o agora,” nia dehan.

Sorin seluk, Diretór Eskola Ensinu Sekundáriu Tékniku Vokasionál Grupu Teknolojia Indústria, Francisco Guterres, hateten, estudante finalista hamutuk 411 hosi eskola ne’e preparadu atu partisipa ezame nasionál, ne’ebé aumenta tan estudante na’in-haat transferénsia hosi Fatumaka.

“Hosi estudante hirak ne’e, na’in-406 mak iha ona informasaun atu partisipa ezame nasionál, maibé falta na’in-lima maka to’o agora laiha informasaun,” nia tenik.

Jornalista : Tome Amado

Editora      : Julia Chatarina

iklan
iklan

Leave a Reply

iklan
error: Content is protected !!