Komisáriu CNE, Olávio da Costa Monteiro Almeida. Imajen TATOLI/Vitorino Lopes da Costa

VIQUEQUE, 09 dezembru 2021 (TATOLI)—Komisaun Nasionál Eleisaun (CNE, sigla portugés) hala’o edukasaun sívika iha postu Lacluta, munisípiu Viqueque, iha kinta ne’e, ba estudante sekundáriu no entidade relevante sira.

“Ha’u apela ba estudante Lacluta sira ne’ebé ho idade 17 ba leten, ne’ebé seidauk iha kartaun eleitorál, agora tenki trata ona hodi partisipa eleisaun sira tuir mai,” Komisáriu CNE, Olávio da Costa Monteiro Almeida, hateten ba Agência TATOLI, iha salaun Igreja Lacluta, kinta ne’e.

Notísia relevante: CNE-STAE halo edukasaun sívika ba estudante Santo Estevão Viqueque

CNE tama sai postu no eskola sira iha munisípiu Viqueque hodi partilla informasaun kona-ba prosesu eleisaun ba sidadaun sira.

“Ami-nia prezensa ohin atu partilla imformasaun hodi esklarese lala’ok eleisaun iha ita-nia rain. Hafoin ita-boot sira hetan informasaun, ita mós sai na’in ba prosesu sira. Tanba ne’e, ita iha kompromisu, eleisaun hodi hili ita-nia na’in-ulun sira ne’ebé sei reprezenta ita hotu,” nia dehan.

Iha fatin hanesan, Reprezentante Administradór postu Lacluta, Luís Amaral, agradese ba CNE tanba iha ona inisiativa di’ak.

“Ha’u hakarak husu ba estudante sira atu simu edukasaun sívika ne’e, hodi kompreende lala’ok eleisaun sira, liuliu eleisaun Prezidensiál iha tinan oin. Tanba imi hanesan eleitór foun, presiza rona ho di’ak prosesu eleisaun,” nia apela.

Atividade ne’e partisipa hosi komunidade Lacluta, Polísia Nasionál Timor Leste (PNTL) Eskuadra Lacluta, Diretór Sekretáriu Tékniku Administrativu Eleitorál (STAE) munisípiu Viqueque, reprezentante partidu, estudante sekundáriu Koléjiu Santo António no Estudante Tékniku Vokasionál Rabina Lacluta, ne’ebé ho totál partisipante na’in 120-resin.

Jornalista : Vitorino Lopes da Costa

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here