Diretór Ezekutivu FONGTIL, Daniel Santos do Carmo. Imajen Tatoli/António Gonçalves

DILI, 09 dezembru 2021 (TATOLI)—Iha komemorasaun loron mundiál anti korrupsaun kinta (09/11) ne’e, Forum Organizasaun Naun Governamentál Timor-Leste (FONGTIL) konsidera Komisaun Antí Korrupsaun (CAC, sigla portugés) la agresivu ba servisu kombate korrupsaun iha TimorLeste.

“Ohin, ita hakarak pronúnsia pontu tolu importante ba públiku, hanesan atividade ida ita halo atu komemora loron kombate korrupsaun iha mundu, liu-liu iha TimorLeste. Ba dahuluk ami hanoin filafali, situasaun ho konstrusaun ka sosa Ró HaksoloK ne’ebé gasta tiha ona millãun 14 (14 milloens) maibé Ró refere seida’uk mai to’o agora, maibé Prokuradór Jerál Repúblika ka Ministériu Públiku la delega kompeténsia ba CAC atu loke investigasaun kriminál konaba motivu hosi ró ne’e la mai. Tanba r’o ne’e konstrui iha 2016 no agora halo ona tinan lima (5) no ita mós gasta ona millãun $14 ne’e sai ona maibé sasán la iha,” Diretór FONGTIL, Daniel Santos do Carmo, hateten liuhosi konferénsia imprensa, iha Caicoli, Dili.

Tuir FONGTIL nia observasaun katak ida-ne’e krime korrupsaun maibé Prokuradór Jerál Repúblika (PGR) ka Ministériu Públiku la delega kompeténsia ba CAC hanesan polísia espesialista ba kombate korrupsaun atu loke investigasaun, entaun signifika Prokuradór Jerál Repúblika mak promove korrupsaun buras iha Timor-Leste.

“Maske sosiedade kestiona, mídia, autoridade hotu-hotu ko’alia kona-ba situasaun Ró Haksolok, maibé Prokuradór Jerál Repúblika la sente ida-ne’e hanesan problema ka kestaun, tanba ne’e to’o agora sira seidauk halo prosesu ruma ba situasaun ida-ne’e no sira rasik la delega kompeténsia ba CAC atu loke investigasaun,” nia dehan.

Ponru daruak, CAC nu’udar polísia espesiál anti korrupsaun tinan-tinan Estadu tau orsamentu, dezde nia harii iha 2010, Governu aloka orsamentu millaun $1,3, entaun kompara ho 2010 to’o 2021 ne’e, CAC gasta tiha ona kuaze millaun $15-resin ba dezenvolve halo servisu ba kombate korupsaun iha Timor-Leste, maibé atendimentu no rezultadu servisu sei sai preukupasaun boot iha sosiedade.

“CAC nia servisu kona-ba investigasaun no prevensaun, haree liubá avaliasaun ba atividade prevensaun hosi Komisaun Anti Korupsaun to’o agora seida’uk haree,” nia dehan.

Maske Estadu apoia ona rekursu kuaze millaun $15-resin ba CAC kada tinan maibé CAC nia servisu no nia produtividade hodi halo mundansa ba sistema Estadu nian, liu-liu lei no funsiona sistema Estadu no mudansa atitude servidór públiku sira ba salva rekursu Estadu seidauk haree.

“Ita haree efeitu iha sosiedade ema-nia mudansa ba ema-nia hahalok atu kontribui prevene ba korupasaun ita la haree, liu-liu iha funsionáriu públiku no entidade Estadu sira uza rekursu Estadu nian ba sira-nia interese privadu, hanesan uza karreta Estadu nian iha loron boot sira ba sira-nia intereese privadu. Signifika, servisu sira-ne’ebé CAC halo atu prevene ka mudansa ema-nia atitude ita la haree,” nia esplika.

Maske Timor-Leste komemora loron ba antí korrupsaun mundiál, maibé situasaun iha Timor-Leste sei iha dezafiu boot, liu-liu mentalidade no atitude Orgaun Soberanu, Governante no Servidór Estadu sira seida’uk hatudu sira-nia hahalok ba mudansa ruma hodi kontribui prevene no kombate korupasaun iha Timor-Leste.

“Aktu ida di’akliu hodi kombate no prevene korupsaun, dahuluk Komisaun Antí Korrupsaun tenke agresivu. Maibé CAC agresivu de’it la to’o, hanesan Prokuradór Jerál Repúblika ka Ministériu Públiku mós tenke agresivu liután,” Diretór FONGTIL ne’e hateten.

Tanba, nia dehan, ezemplu mak se Ministériu Públiku la halo delegasaun hanesan kazu Ró Haksolok, kazu USB $400-resin no kazu sira seluk, tanba ida-ne’e relatóriu hosi Tribunál das Kontas ne’ebé relata klaru ona no iha ona ema hotu asesu.

Se Prokuradór Jerál Repúblika kuandu la agresivu hodi haree ida-ne’e sai hanesan problema, dezáfiu ka sai indísiu korrupsaun hodi fó kompeténsia ba CAC atu loke investigasaun entaun Timor-Leste labele ba oin.

Xave atu kombate korrupsaun, nia dehan, dahuluk mak aktu prevensaun sira tenke la’o makaas atu muda mentalidade ka atitude servidór públiku nian no Ministériu Públiku tenke agresivu.

CAC estabelese iha Timor-Leste iha fulan-marsu tinan 2010 no eziste tinan 11 ona ho misaun importante tolu mak halo investigasaun, prevensaun no kombate korrupsaun.  

Jornalista : Nelia Fernandes

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here