Universidade Katólika Timorense. Imajen mídia GPM.

DILI, 08 dezembru 2021 (TATOLI)– Primeiru-Ministru (PM), Taur Matan Ruak, espera ezisténsia Universidade Katólika Timorense (UCT, sigla portugés) sai ensinu superiór ne’ebé exelente hodi forma sosiedade nasionál.

Xefi Governu konsidera loron festivu ida-ne’ebé konkretiza podér hosi mehi Bispu sira nian hanesan Dom Carlos Filipe Ximenes Belo, Dom Basílio do Nascimento no Dom Alberto Ricardo da Silva, hodi harii iha territóriu nasionál.

“Instituisaun Timorense bele sai ensinu superiór ne’ebé exelente, ne’ebé bele konkista méritu no destaka iha sosiedade nasionál ida-ne’ebé iha nafatin mudansa, interdependente no kompetitivu liután,” Taur Matan Ruak, hateten iha ámbitu seremónia inaugurasaun no abertura solene UCT, iha Balide, kuarta ne’e.

Xefe Governu ne’e haktuir, liu ona besik tinan 20 hafoin restaurasaun independénsia nasionál, ho satisfasaun no ksolok boot ne’ebé ohin loron selebra abertura Universidade Katólika Timorense, ho domin konsagra ona ba São João Paulo II, ne’ebé ho devosaun ne’ebé boot.

“Ideia ida-ne’ebé konkretiza ona tanba ekipa ida-ne’ebé serbisu maka’as no mobiliza esforsu sira, tau hamutuk koñesimentu no esperiénsia sira-ne’ebé hetan ona iha tinan barak nia laran, dedikasaun no esforsu hosi institutu universitáriu oinoin ne’ebé hola parte iha laran, la’ós de’it Arkidioseze Metropolitanu Dili nian, nu’udar entidade impulsionadór,” Taur hateten.

Nune’e, Xefe Ezekutivu ne’e hato’o parabéns ba membru hotu Komisaun Instaladora no sira-ne’ebé kontribui ba realizasaun ideia ne’e.

“Estabelesimentu ensinu superiór ida-ne’ebé dezenvolve vokasaun boot Igreja Katólika nian, enkuantu servisu ba komunidade ekleziál no umana, la’ós de’it iha formasaun integrál ba joven no adultu sira, iha koñesimentu tékniku no sientífiku sira,” Xefe Governu felisita.

Nune’e mós valór no méritu síviku sira, umanista no morál sira, ne’ebé sei promove formasaun ba sidadaun fiar-na’in sira, família no komunidade sira-ne’ebé tolerante, ekuitativa, inkluziva, demokrátika no pasífika liután.

Nia hatutan, valór sira tenke kontribui ba dezenvolvimentu ne’ebé di’ak, sustentável no ekilíbriu ba rekursu prinsipál ne’ebé iha.

“Ho ida-ne’e, ami ksolok ba prezensa hosi Universidade Katólika, ho nia prioridade no objetivu sira aposta iha transferénsia koñesimentu ne’ebé exelente, iha investigasaun akadémika kolaborativa, iha kultura méritu, iha kriasaun kapasidade no kompeténsia,” Xefe Governu afirma.

Agradese Arkidioseze Metropolitana Dili no Santa Sé

Biban ne’e, Primeiru-Ministru ne’e agradese ba inisiativa hosi Arkidioseze Metropolitana Dili, ne’ebé reprezenta hosi Arsebispu Dom Virgílio do Carmo da Silva, tanba konkretiza ona projetu boot ida-ne’e.

“Agradese ba Institutu Universitáriu oioin, ba Fundasaun São Paulo no ba autoridade interveniente oinoin sira-ne’ebé envolve iha país ne’e, ne’ebé iha Konferénsia Episkopál Timorense nia mahon, ne’ebé reprezenta hosi nia Prezidente,  Reverendísimu, Dom Norberto do Amaral, Bispu Dioseze Maliana, kontribui ona ba harii instituisaun ne’ebé daudaun ne’e hahú ninia atividade letiva,” Xefe Governu hato’o felisitasaun.

Nune’e mós agradese ba apoia hosi Santa Sé, ne’ebé reprezenta hosi Monsignor Marco Sprizzi, Chargé d’Affaires hosi Nunsiatura Apostólika Dili nian, ne’ebé posibilita rekoñesimentu internasionál ba estabelesimentu ensinu superiór foun ida-ne’e.

“Ha’u hakarak husik hela ha’u-nia votu susesu ba alunu sira hotu, profesór sira, funsionáriu no dirijente sira, ne’ebé hahú agora asume devér importante hodi implementa objetivu boot sira ne’ebé Universidade Katólika define ona, hodi fó onra ba esforsu sira jerasaun pasadu sira-nian, no retribui ho investimentu ne’ebé halo ona hosi jerasaun sira ohin loron nian”, Xefi Governu fó apresiasaun UCT.

Jornalista         : Antónia Gusmão.

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here