COVALIMA  8 Dezembru 2021 – Sekretararia Estadu Arte no Kultura (SEAK), Sentru Nasionál Chega (CNC, sigla portugés) veteran, autoridade munisipál lansa ona Muzeu Memoriál Rezisténsia Muinisipál lansa ona iha Covalima ho objetivu prezerva no valoriza istória funu ba libertasaun nasionál dezde 1974 to’o 1999.

Diretór Jerál Arte no Kultura Manuel Smith hamutuk ho Diretor Ezekutivu CNC Hugo Fernandes, autoridade munisípiu, tersa kalan lansa ona Muzeu Memoriál Rezisténsia Munisipál Covalima.

Hafoin hala’o lansamentu, reprezentante Administradór Munisípiu Covalima Francisco Mendonça dirije ‘menutu hakmatek” akompaña ho puízia ne’ebé aprezenta  hosi Prezidente Konselu Imprensa, Virgílio da Silva Guterres. 

Diretór Jerál Arte no Kultura, Manuel Smith, hateten, estabelesimentu muzeu memoriál munisipál nu’udar onra boot iha Covalima tanba durante ne’e iha territóriu nasionál eziste de’it muzeu rezisténsia.

“Ohin, hamosu muzeu memoriál espesiál iha Covalima. Parabéns ba ita-boot sira, ita hatene katak espasu muzeu hanesan fatin edukativu, transforma ema kona-ba istória pasadu ,” Manuel smith, ko’alia iha lansamentu muzeu memoriál iha Covalima, tersa kalan. 

Nia fiar katak, muzeu memoriál munisipál ne’e sei atria vizitante lokál no komunidade internasionál,  kona-ba prezervasaun no valorizasaun istória pasada, ne’ebé identiku ho karáter komunidade munisípiu nian.

“Ita konsege prezerva ona istória ne’ebè maka durante ne’e ita hein no ohin hakerek iha istória ema seluk sei mai haree no sensibiliza parte seluk koñese di’akliu kona-ba momentu akontesimentu hahú hosi 1974 to’o 1999,” nia hateten. 

Nune’e, Ministériu Ensinu Superiór, Siénsia no Kultura liuhosi Sekretaria Arte no Kultura, estabelese rejime jurídiku patrimóniu kulturál númeru 33/2017. Iha rejime ne’e fó  espasu ba SEAK estabelese muzeu memoriál sira.  

Reprezentante Administradór Munisípiu Covalima, Francisco Mendonça da Costa, konsidera muzeu rezisténsia iha Covalima importante tebes.

“Ita iha ona  fatin atu bele arkiva istória hirak-ne’ebè luta-na’in  no funu-na’in sira, ita asiste sira konta sira-nia istória pasadu sai istória iha Timor-Leste, espesialmente iha Covalima,”  nia katak. 

Iha lansamentu ne’e, sasin sira konta istória pasadu ne’ebè Covalima mós luta ba Independénsia iha tempu okupasaun Indonézia. 

Diretór Ezekutivu Sentru Nasionál Chega (CNC, sigla portugés), Hugo Maria Fernandes, reforsa, CNC foti ideia atu harii muzeu memoriál iha Covalima ne’e mai hosi ideia ema pesoál bainbain. 

“Ideia mak hosi buat simples dalaruma ita hanoin katak ideia mai hosi líder sira maibé CNC harii muzeu ida-ne’e mak hosi ema kiik ida, ha’u labele temi iha-ne’e. Ho ideia hirak-ne’e  CNC konkretiza mehi hodi  harii muzeu ne’e,” nia esplika. 

“Ha’u hanoin CAVR uluk dokumenta no arkivu hosi munisípiu hotu nia memória,  tanbasa memória rai fali iha sira-nia rai. Ha’u hakarak harii muzeu memoriál iha munisípiu sira, ita hahú ona iha Covalima,” nia dehan.

Diretór CNC ne’e fó-sai katak, estabelesimentu muzeu memoriál la’os tanba istória ema-boot sira, maibé atu fasilita ema bainbain sira,  bele asesu ba sira-nia memória rasik.

Muzeu memoriál iha Covalima estabelese bazea ba inisiativa koletiva entre Administrasaun Munisipál Covalima, Konsellu Veteranu Covalima, autoridade lokal no CNC, nu’udar mekanismu hodi habelar informasaun kona-ba istória pasadu Timor Leste nian, hahú hosi períodu 1974 to’o 1999.

Muzeu memória munisípal ne’e mós atu akamoda peskiza edukasaun, kolesaun prezervasaun ba matéria sira iha nune’e jerasaun foun bele aprende valór importante hosi povu Timor-Leste nia istória pasada dezde 1974 to’o 1999.

Iha serimónia lansamentu ne’e iha atividade oinoin, hahú hosi mini audiénsia públiku ne’ebé Sasin sira sei konta sira-nia testamuña kona-ba istória 1974 to’o1999. 

Jornalista         : Celestina Teles

Editór               : Evaristo Martins 

PUBLISIDADEiklan

HAKEREK NO HATÁN

Please enter your comment!
Please enter your name here