Prezidente Konsellu Administrasaun IGE,I.P, Ermenegilda da Costa Laurentina tún direta observa fatin inundasaun iha Balide. Imajen/IGE,I.P.

DILI, 08 dezembru 2021 (TATOLI) – Institutu Jestaun Ekipamentu, Institutu Públiku (IGE,I.P, sigla portugés), liderada Ermenegilda da Costa Laurentina, observa direita sedimentasaun iha Dili no foti desizaun mobiliza ekipamentu hodi solusiona fatin inundasaun iha kapitál nasaun ne’e.

Ho nune’e, Institutu Jestaun Ekipamentu, Institutu Públiku, daudaun ne’e mobiliza ona ekipamentu pezadu sira hodi tún ba terrenu hodi normaliza bee-dalan no hasai sedimentasaun iha fatin inundasaun. 

Rai nakonu iha estrada laran iha área Balide. Imajen/IGE,I.P.

“Hafoin udan ami (ekipa IGE) tún direta observa hela fatin sira-ne’ebé fásil inundasaun mosu, liuliu iha Balide, Metiaut. Ne’ebé daudaun ne’e ami prepara hela ekipa hodi apoia urjentimente,” Prezidente Konsellu Administrasaun IGE,I.P, Ermenegilda da Costa Laurentina, informa ba Agência Tatoli via telefónika, kuarta ne’e.

Nia fó-sai katak, bainhira udan maka’as, IGE simu kontaktu direta hosi populasaun Balide no tékniku IGE nian hasoru malu ona ho komunidade hodi halo koordenasaun no daudaun ne’e mákina iha dalan hodi apoia ho urjénsia.

Kona-ba mota, Prezidente Konsellu Administrasaun ne’e akresenta, ekipa IGE mós halo observasaun ba mota sira maibé di’ak hela katak seidauk iha sinál atu hamosu inundasaun.

“Maibé parte hosi Caicoli no Colmera mak bee sa’e no sulin ona iha estrada laran kauza hosi dreinazen ne’ebé kloot, no ami mós simu ona informasaun hosi ekipa IGE nian daudaun iha terrenu nune’e ami mobiliza daudaun ona ekipamentu hodi ba atende,” nia subliña.

Ekipamentu pezadu hanesan, mákina loader tolu, eskavatór rua, no karreta fuzu sira dadaun ne’e preparadu hodi fó atendimentu nune’e pesoál sira hamutuk na’in-18 preparadu apoia urjénsia.

Daudaun ne’e, IGE seidauk simu informasaun, kona-ba akontesimentu ruma iha munisípiu sira, maibé tékniku no ekipamentu IGE nian mós destakadu ona iha munisípiu sira hanesan, Lautem, Natarbora-Manatuto, Bobonaro, Viqueque hodi fó atendimentu.

Notisia relevante: Udan iha Dili liu oras ida, Vítima inundasaun 4 abríl hakarak fila ba munisípiu

Jornalista         : Antónia Gusmão

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here