Komandu Falintil-Forsa Defeza Timor-Leste (F-FDTL) liuhosi ekipa médiku militár hala’o tratamentu saúde gratuita ba komunidade sira. Iha Aldeia Moleana, Suku Ritabou, Postu Administrativu Maliana Vila, kuarta (08/12). Imajen Tatoli/Francisco Sony.

BOBONARO, 08 dezembru 2021 (TATOLI) – Komandu FALINTIL-Forsa Defeza Timor-Leste (F-FDTL) liuhosi Departamentu Saúde serbisu hamutuk ho pesoál saúde postu sira, kuarta ne’e, hala’o tratamentu saúde gratuita ba komunidade aldeia Moleana, suku Ritabou, postu administrativu Maliana Vila, munisípiu Bobonaro.  

“Prezensa F-FDTL iha Bobonaro hala’o ezersísiu Cobra 21-2, ezersísiu ne’e iha atividade ida naran relasaun sivíl militár (CIMIC) ne’ebé maka hola parte iha área saúde nian. Entaun kuarta ne’e ami mai iha aldeia Moleana, médiku sira halo atendimentu saúde nomós fahe informasaun kona-ba vasinasaun ba populasaun sira,” Komandante Postu Komandu Prinsipál Ezerísiu Cobra 21-2, Tenente Koronél Renilde Guterres Cortereal e Silva, ko’alia iha aldeia Moleana. 

Tratamentu saúde ne’ebé médiku sira foka liu mak ba moras ho tipu moras kulit, me’ar, insfesaun vias respiratóriu no moras sira seluk.

Realiza kampaña vasinasaun kontra COVID-19

Komandu Falintil-Forsa Defeza Timor-Leste (F-FDTL) liuhosi ekipa médiku militár hala’o tratamentu saúde gratuita ba komunidade sira. Iha Aldeia Moleana, Suku Ritabou, Postu Administrativu Maliana Vila, kuarta (08/12). Imajen Tatoli/Francisco Sony.

Iha ámbitu ne’e, membru Forsa Armada sira sensibiliza informasaun kona-ba prevensaun no mitigasaun surtu COVID-19 iha Timor-Leste.

Tuir Tenente Koronel Renilde katak, populasaun iha área rurál menus tebes informasaun kona-ba prevensaun pandemia globál ne’e, tanba ne’e ho prezensa F-FDTL nian desimina mós informasaun prevensaun no kampaña vasinasaun kontra surtu mundiál ne’e ba populasaun sira.

Xefi aldeia Moleana, Lúcia Pereira, sente kontenti tebes atividade ne’e tanba durante ne’e populasaun ladún asesu ba fasilidade saúde hodi hetan atendimentu.

“Ha’u sente kontente, tanba iha oportunidade ne’e ami bele hetan tratamentu saúde gratuita hosi F-FDTL. Tanba durante ne’e, ami-nia populasauna ladún asesu ba sentru saúde sira. Ne’ebé ho atividade ne’e ami halo tratamentu no hetan ai-moruk hodi konsumu,” autoridade lokál ne’e haktuir.

Kona-ba kampaña vasinasaun, xefe aldeia ne’e fiar katak, ho informasaun ne’ebé membru F-FDTL sira fó bele loke hanoin komunidade nian tanba durante ne’e komunidade konsume barak liu lia falsu nune’e deside lakohi vasina.

Jermana Soares nu’udar abitante agradese ba ekipa komandu forsa defeza nian tanba realiza ona atividade tratamentu saúde gratuita ne’e iha sira-nia hela fatin.

“Durante ne’e ami hetan tratamentu ne’e mai hosi pesoál saúde no ohin loron F-FDTL mai ami direta fó tratamentu ba ami,” Jermana kontente.

Hafoin fó tratamentu saúde ekipa sira hala’o vasina ba komunidade iha suku refere. Atividade ne’e durante loron tolu, loron dahuluk hala’o ona iha tersa ne’e iha aldeia Tunubibi, suku Tapo-Memo, kuarta ne’e iha suku Ritabou no kinta iha suku Leolima. 

Jornalista         :  Francisco Sony

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here