Vítima violénsia doméstika no abandonadu hamutuk na’in-10 tuir Formasaun hosi fasilitadora relasiona ho ajudu fundu rekupersaun ekonomika família iha Uma Mahon Watulete, Baucau Vila Nova, Baucau. tersa (07/12). Imajen Tatoli/Natalino Belo.

BAUCAU, 07 dezembru 2021 (TATOLI)—Fundasaun Uma Paz realiza formasaun mikro negósiu ba vítima violénsia doméstika no kazu abandona hamutuk nain-10 antes atu apoia fundu rekopersaun ekonomia.

Diretóra Ezekutiva Fundasaun Uma Paz Baucau, Felismena Belo, hateten programa refere realiza servisu hamutuk ho AJAR Timor-Leste apoia ekonomia família liu-liu ba feto sira-ne’ebé livre ona hosi violénsia hanesan eis-kliente sira-ne’ebé sai ona hosi uma mahon no livre ona hosi justisa.

Diretóra Ezekutiva Fundasaun Uma Paz Baucau, Felismena Belo. Imajen Tatoli/Natalino Belo.

“Objetivu atu rekopera fali sira-nia ekonomia família, hamutuk ema nain-10 ne’ebé antes ne’e hasoru probelma violénsia doméstika no kazu abandona mak sai trajetu no ami hamutuk indentifika sira-nia planu negosiu, nune’e bele hadia ekonomia família,” Diretóra Ezekutiva Fundasaun Uma Paz ne’e ba Agência Tatoli iha Villa Nova, Baucau, tersa ne’e.

Pontu inportante hosi formasaun ne’e mak foku liubá matéria atu kria mikro negósiu liu-liu buka ideia kria negosiu ne’ebé di’ak nune’e bele ajuda rekopera ekonomia.

Fundu apoia hosi AJAR Timor-Leste sai hanesan atividade regulár ne’ebé trajetu ba eis kliente Fundasaun Uma Paz hafoin rekopera problema no livre hosi justisa nian.

“Ami identifika konforme sira-nia nesesidade. Balun hakarak faan obralan, kioske, balun hakarak aumenta negosiu ne’ebé kada pesoál kiik liu $200 no kiik liu $500,” nia hateten.

Fundasaun Uma Paz Baucau mós iha esperansa boot atu bele rekopera ekonomia tanba liuhosi faze oioin inklui treinamentu ba negósiu hanesan bukae atu jere orsamentu hodi hetan lukru.

Uma Paz rasik sempre halo monitorizasaun no tau matan regular, no vítima na’in-10 ne’e hotu-hotu feto hosi postu administrative Baucau Vila, Quelicai, Vemasse no Venilale.

Durante tinan rua, hosi tinan 2020 no 2021, programa rekopersaun ekonomia hosi Uma Paz ajuda ona vítima hamutuk nain-50 iha munisípiu Baucau.

Benefísiáriu hosi Kailara, suku Buibau, postu Baucau Villa, Maria das Dores Gusmão Perreira, sente kontente ho formasaun refere no prontu atu rekopera fali ekonomia liuhosi tulun orsamentu hosi Uma Paz hanesan harii kioske hodi faan nesesidade bázika.

“Ha’u-nia oan barak, na’in hitu kedas. Balun eskola no balun la eskola. Importante, uza osan loke kioske hodi faan supermie, sigaru, bee, masin, masin-midar, sigarau no seluk tán, pelumenus faan hetan osan,” nia dehan.

Jornalista : Natalino Belo

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here