Prezidente Repúblika entrega uma ba veteranu António Mautersa de Deus “Malikati”. Imajen Tatoli.Argentina Cardodo.

ERMERA, 07 dezembru 2021 (TATOLI)—Prezidente Repúblika liuhosi Xefe Kaza Sivíl, Francisco Maria Vasconcelos, tersa ne’e entrega uma kbit laek ba veteranu Antonio Mautersa de Deus “Malikati” iha aldeia Lutulala Leten, suku Haupu, postu administrativu Letefoho, munisipiu Ermera.

Antonio Mautersa de Deus hanesan veteranu ida ne’ebé fo kontribuisaun Luta ba ukun rasik aan, maibe to’o ohin loron seidauk hetan pensaun hosi Governu, ne’ebé durante ne’e hela iha uma kondisaun ladún di’ak hamutuk ho nia familia. Tanba ne’e, Prezidente Repúblika fó apoiu hodi hari uma fatin mahon ba veterenu ne’e.

Xefe Kaza Sivíl Prezidensia Repúblika, Francisco Vasconcelos, hateten apoiu ne’ebé oferese ba veteranu ne’e tanba ninia kontribuisan luta ba ukun an no ninia kondisaun moris daudaun ne’e mak urjente duni atu fó apoiu.

Prezidente Repúblika entrega uma ba veteranu António Mautersa de Deus “Malikati”. Imajen Tatoli.Argentina Cardodo.

“Ohin ita mai inaugura fatin ida-ne’e, fatin ida-ne’e reprezenta ita-nia luta-na’in barak ne’ebé mak presiza tau matan hosi ema hotu-hotu ne’ebé mak iha posiblidade. La’ós de’it ita-nia Governu, la’ós de’it Prezidente Repúblika maibé ema hotu-hotu ne’ebé mak hetan benefísiu hosi ukun rasik an ida-ne’e, ne’ebe mak iha posiblidade sira mos bele espresa sira nia soliedariedade bele apoiu. Ita-nia Governu no ita-nia Estadu tau matan duni ba veteranus sira,” Francisco Vascocelos hateten.

Xefe Estadu fó apoiu tanba nia nu’udar veteranu ida dezde inísiu luta ba ukun rasik an no nu’udar delegadu ida-ne’ebé antigun. Apoiu ida-ne’e la’ós tanba nia delegadu ida maibé apoiu tanba nia veteranu ida no nia kontribuisaun ba rai no ba estadu ida ne’e, tanba ne’e mak nia iha situasaun ida ne’ebé mak urjente duni atu fó apoiu ba nia.

Veteranu sira iha fatin hotu tenke tuur hamutuk organiza an ba dezenvolvimentu liuhosi halibur forsa hotu, tanba iha konsellu veteranu entaun veteranu sira iha postu administrátivu ne’e tenke tuur hamutuk organiza an no organiza povu no komunidade ida atu kontribui iha dezenvolvimentu nasionál.

Iha biban ne’e, Rosita Rodrigues hanesan feen kaben hosi Antonio Mautersa espresa nia sentimentu kontente tanba bele hetan apoiu hosi Prezidente Repúblika.

“Ami hela iha uma tuan ne’e tinan rua, besik atu monu mak haree ba halis ona. Maibé ami pasiénsia hodi hela. Ami hela tinan rua to’o boot sira hanoin dehan ida-ne’e kala ki’ak ida ki’ak tebe-tebes,” nia dehan.  

Nune’e mós, oan feto hosi veteran Senhor Antonio Mautersa, Maria Rodrigues, hato’o agradese ba Prezidente Rrepúblika no nia espoza tanba bele fó ona mahon ba nia aman no sira bele hela ho hakmatek, kompara ho antes ne’e sira sente la seguru bainhira udan no anin boot mosu.

“Uluk uma tuan ne’e, apa ho ama, ha’u ho alin na’in tolu, ami hela iha uma kiik oan ne’e de’it ho kuartu rua, maibé uma boot sobu tiha ne’e kuandu udan ami la hela. Anin boot mós ami latama, tanba tauk udan boot uma tohar, ne’ebè ami hela iha uma kiik-oan ne’e de’it.

Daudaun ne’e veteranu Antonio Mautersa de Deus ho naran kódigu Malikati, sofre hela moras stroke no tuur de’it iha kadeira roda, no bainhira atu book an tenbke apoiu husi oan sira mak nia bele movimentu iha uma laran.

Imajen Tatoli.Argentina Cardodo.

Entretantu uma kbit laek ne’ebé oferese hosi Prezidente Repúblika ne’e ho montante orsamentu $3.600, enkuantu ba nesesidade uma laran hanesan kama, armariu no seluk tan, hetan apoiu hosi komisaun SADIA, ne’ebé fó liuhosi gabinete espoza prezidente repúblika.

Uma ne’e konstrui ho medida 8×10, ne’ebé hahú halo konstrusaun iha fulan-outubru tinan 2021 no ramata iha fulan novembru 2021.

Partisipa iha serimonia inaugurasaun UKL ne’e xefe kaza sivil no kaza militár, administradór postu administrátivu Letefoho, xefe suku Haupu no asiste husi família Antonio Mautersa De deus “Malikati”.

Iha tinan 2021 ne’e, Prezidensia Republika fó apoiu Uma ba Kbiit Laek sira hamutuk uma lima (5) kompsotu hosi munisípiu Viqueque, postu administrative Ossu tolu (3 ); munisípiu Bobonaro, postu administrative Maliana apoiu uma ida (1) no iha munisípiu Ermera, postu administrative Letefoho, suku Haupu, aldeia Lutlala konstrui uma ida (1).

Jornalista : Argentina Cardoso

Editor     : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here