Imajen/Espesiál.

DILI, 07 dezembru 2021 (TATOL)—Prezidente Repúblika, Francisco Guterres Lú Olo, apela ba kompatriota hotu-hotu atu aproveita Loron Memória reflete dalan naruk terus nian ne’ebé hala’o tiha ona hodi inspira timor-oan no fó forsa atu kontinua obra ne’ebé inísia tiha ona.

“Ha’u apela ba kompatriota hotu-hotu atu aproveita Loron Memória, ho dalan, individualmente ka iha koletivu, reflete dalan naruk terus nian ne’ebé ita liutiha ona. Nia bele inspira ita no fó forsa atu kontinua obra ne’ebé inísia tiha ona,” Prezidente Repúblika hateten iha mensajen ba Povu tomak iha komemorasaun loron invazaun 07 Dezembru 1975 ba dala-46 (07 dezembru 1975-07 dezembru 2021), liuhosi komunikadu imprensa ne’ebé Agência Tatoli asesu, tersa ne’e.

Loron 7 Dezembru marka inísiu hosi Povu nia luta naruk nakonu ho aten-brani ba ninia independénsia no liberdade ne’ebé manán hafoin tinan-24 nia laran.

“Ita hotu preokupadu atu harii futuru. Atu halo ne’e nesesáriu tebes valoriza pasadu. Ita-nia dever atu hatene sakrifísiu ne’ebé hatudu husi kompatriotas mate iha funu laran, no nu’udar forma ida agradese, forma ida rekoñese saida mak sira halo tiha ona ba rai ne’e. Lahó ho sira-nia mártiriu no sakrifísiu ita la hetan pátria ida livre no independente,” Prezidente Repúblika Lú Olo hateten.

Xefe Estadu husu ba família, Eskola, Partidu Polítiku, Organizasaun Sosiedade Sivíl no Sidadaun hotu-hotu halo esforsu atu koñese Timor-Leste nia istória, valoriza Timor-Leste nia pasadu, foti lisaun atu bele garante jerasaun tuirmai hodi hetan futuru ida di’akliu no pás.

Tanba ne’e importante tebes ba timor-oan atu hanoin hikas faktu iha pasada no reflete kona-ba saida mak timor-oan halo, ohin no aban, atu kontinua obra hosi mártir sira.

Prezidente Repúblika hateten, relijiaun Kristá kontribui fortemente ba ita-nia identidade. Liafuan kalváriu sai familiar ho ninia signifikadu terus.

“Iha 7 dezembru 1975, militár Indonézia lansa invazaun ho eskala boot ba ita-nia país. Marka mós inísiu ita-nia Povu nia mártiriu naruk, kalváriu nasionál,” nia dehan.

Prezidente Repúblika haktuir, kompatriota barak mate iha loron trájiku ne’e, inklui kompatriota ho orijen xinés, Borja da Costa, Rosa Muki Bonaparte no jornalista Australianu, Roger East.

Konstituisaun Repúblika Demokrátika Timor-Leste rekoñese no valoriza rezisténsia sekulár Povu Maubere kontra dominasaun estranjeira no sira hotu nia kontribuisaun ba luta independénsia nasionál.

Parlamentu Nasionál, liuhusi Lei númeru 3/2016, 25 maiu, eleva loron 7 dezembru nu’udar Loron Memória.

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here