Imajen/Mídia PR.

DILI, 07 dezembru 2021 (TATOLI)—Orsamentu Jerál Estadu (OJE) 2022 hamutuk $29,869,289 ba Ministéiru Finansa (MF) lideradu Rui Augusto Gomes, aprovadu hosi Parlamentu Nasionál (PN) iha faze espesialidade.

“Rezultadu votasaun a-favór 45, abstensaun 17 no kontra 0. Nune’e orsamentu Ministériu Finansa nian passa,” Prezidente Parlamentu Nasionál, Deputadu Aniceto Longuinhos Guterres Lopes, deklara liuhosi Plenariu, PN, tersa ne’e.

Hosi totál OJE 2022 MF nian ne’e aloka ba kategoria saláriu vensimentu $4,019,189, bens servisu $20,022,443, kapitál minór $5,000,000, kapitál dezenvolvimentu $827,657 no transferénsia públika laiha.

Nune’e, molok aprova OJE 2022 ba MF ne’e, hosi bankada opozisaun hamosu proposta rua husu redusaun. Proposta dahuluk propoin atu hasai tiha orsamentu ne’ebé aloka ba kategoria kapitál dezenvolvimentu tanba taxa ezekusaun to’o loron 02 dezembru 2021 nia persentajen 0%. Tanba ne’e mak propoin atu hasai osan ho montante $827,657 hosi orsamentu MF nian.

Proposta daruak haktuir, bazea ba paresér hosi Komisaun C-PN (finansa públika) hatudu katak, taxa ezekusaun kategoria bens no servisu inklui obrigasaun foin atinje 39,21%, tanba ne’e propoin atu hemenus osan iha kategoria bens no servisu ho montante $279,035.

Maibé, hafoin rona tiha esplikasaun hosi Governu, liu-liu Ministru Finansa (MF), Rui Augusto Gomes, proponente ba proposta, deputada Fernanda Lay (Bankada CNRT), deside retira nia proposta tanba konsidera, esplikasaun sira ne’e pertinente.

“Kona-ba proposta redusaun ne’e maibé iha tinan 2022 atividade sira-ne’e justifika tiha ona. Purtantu, ida-ne’e tama tiha ona iha planu anuál ministériu finansa nian, atu halo konstrusaun garajen nomós dormitóriu iha postu Salele no Batugade. Ida-ne’e atu responde polítika Governu nian atu labele sosa tan karreta Estadu, tanba ne’e mak hakarak halo garazen sira-ne’e di’ak,” Governante ne’e esklarese.

Enkuantu, orsamentu ne’e, sei finansia programa rua (2), sub-programa ualu (8) no atividade 39.

Programa jestaun finansa públika sei gasta $19,078,937 no programa boa-governasaun no jestaun instituisionál sei gasta $10,790,352. Nune’e, programa jestaun finansa públika ho nia sub-programa jestaun finanseiru no patrimóniu nia atividade inventáriu no jestaun bens móveis, jestaun no alineasaun bens móveis Estadu.

Sub-programa  reforma finansa públika no patrimóniu Estadu nia atividade elaborasaun polítika fiskál, jestaun finansa públika  no patrimóniu Estadu, elaborasaun inisiativa lejizlativa kona-ba reforma kuadru normativa jestaun finansa públika patrimóniu Estadu, formasaun rekursu umanu iha área jestaun finansa públika, atualizasaun sistema informasaun iha área jestaun finansa públika no patrimóniu Estadu,  mellora infraestrutura no lojístika ba implementasaun reforma jestaun finansa públika no patrimóniu Estadu.

Sub-programa ezekusaun orsamentál no prestaun konta ho nia atividade koordenasaun no supervizaun operasaun kontabilizasaun reseita despeza públika, pagamentu no administrasaun dotasaun todo Governu, atividade monitorizasaun desentralizasaun finanseira, jestaun administrasaun públika, kontabilista no normalizasaun kontabilidade, pagamentu no administrasaun dotasaun tudo Governu.

Sub-programa planeamentu no orsamentu ho nia atividade apoia Governu iha definisaun prioridade nasionál investimentu públiku no estratéjia nasionál, elaborasaun proposta OJE, akompañamentu no avaliasaun ezekusaun OJE.

Sub-programa publikasaun estatístika no analiza polítika ekonómika ho atividade metodolojia no rekolla dadus estatístika, analiza no divulgasaun informasaun estatístika iha dominiu sosiál no ekonómiku, publikasaun estatístika ofisiál, polítika ekonómika.

Sub-programa mobilizasaun jestaun rekursu externu no arekadasaun reseita ho nia atividade jestaun efikásia no mobilizasaun ajudu externa, parseira públika privadu, jestaun divída públika, akonpañamentu no avaliasaun utilizasaun fundu petrolíferu, administrasaun kobransa impostu no taxa aduaneiru, administrasaun no kobransa impostu iha área tributária, polítika investimentu no monitorizasaun utilizasaun fundu petrolíferu.

Portantu, programa boa-governasaun no jestaun instituisionál ho nia sub-programa rua no atividade 12.

Jornalista : Antónia Gusmão

Ediór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here