Dezeñu ospitál munisipál Viqueque. Imajen Tatoli/Vitorino Lopes da Costa.

VIQUEQUE, 07 dezembru 2021 (TATOLI)—Vise Xefe Estadu Maiór Jenerál Falintil-Forsa Defesa Timor-Leste (F-FDTL), Majór Jenerál Falur Rate Laek, propoin ba autoridade iha munisípiu Vuqueque katak bainhira konstrui ospitál munisipál Viqueque, tau naran loron istóriku sira hanesan “7 dezembru 1975”.

Notísia Relevante: Komunidade Uabubu-Caraubalu entrega rai ba Governu konstrui ospitál munisipál

“Ha’u hakarak propoin ba autoridade sira iha munisípiu Viqueque, ha’u propoin ospitál munisipál Viqueque tau naran ‘7 dezembru 1975’. Maibé depende imi hili naran ida-ne’ebé,” Falur Rate Laek hateten ba Agência Tatoli, iha Buanurak, Viqueque tersa ne’e.

Vise Xefe Estadu Maió rne’e hateten, naran ospitál tau naran istóriku hanesan ‘8 agustu levantamentu armada, 10 agustu inklui fatin istóriku Weradek ne’ebé traisaun nian uluk ema mate barak no ‘7 dezembru’.

“Entre naran sira ne’ebé ha’u propoin ne’e, ha’u hakarak komunidade no autoridade sira deside tau 7 dezembru 1975,” Falur propoin.

Hosi naran istóriku sira-ne’e depende ba komunidade sira hili hakarak tau naran ospital Wedara mós di’ak.

“Naran hospital nian ne’ebé ha’u propoin sai hanesan pensamentu ha’u-nian. Depende komunidade no autoridade sira hili,” nia dehan.

Iha biban ne’e, adiministradór munisípiu Viqueque, Januario Soares “Bolly”, haktuir sei haree hamutuk naran ba ospitál tanba foin iha faze entrega rai no sei prosesu lubuk ida mak sei tuir mai.

“Komunidade tomak iha munisípiu Viqueque nafatin hamutuk ho ha’u hodi ita lori prosesu harii ospitál munisipál ne’e. Ita seidauk defini naran sei iha prosesu ne’ebé ita tenke halo,” nia hateten.

Jornalista : Vitorino Lopes da Costa

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here