Prezidente Repúblika, Francisco Guterres Lú Olo, hala’o audiénsia ho Prezidente Tribunal Rekursu, Deolindo do Santos. Imajen/ média PR.

DILI, 06 dezembru (TATOLI)– Prezidente Tribunál Rekursu (PTR), Deolindo dos Santos, hateten, Xefe Estadu enkoraja atu kontinua mellora serbisu tribunál sira, maski hasoru difikuldade hanesan infraestrutura no fasilidade sira.

“Maski iha problema no difuldade sira hanesan infraestrutura no fasilidade sira, maibé Prezidente Repúblika fó apresiasaun pozitivu no husu atu mellora servisu tribunál hodi funsiona nafatin ho diak liután,” Prezidente TR ne’e, hateten ba jornalista sira hafoin enkontru ho PR LÚ-OLO iha Palasiu Prezidensiál , Bairru-Pité, segunda ne’e.

Anualmente Governu no Parlamentu Nasionál aloka orsamentu ba tribunál sira atu fó asisténsia di’akliu ba públiku. Nesesidade balun iha tribunál sira konsege resolve, maibé balun seidauk.

Tanba ne’e, Prezidente Tribunal Rekursu hein katak Governu no Parlamentu Nasionál bele preve orsamentu ba falta infraestrutura no ekipamentu traballu nian iha tribunál.

“Difikuldade ne’ebé Tribunal sei hasoru, falta infraestruturas no ekipamentu traballu. Ita konsege rezolve balun ona ho OJE 2021. Balun ne’ebé seidauk konsege rezolve, ita ko’alia ona ho Governu nu’udar jestór ba Orsamentu Estadu nian no Parlamentu rasik atu bele prevee orsamentu ne’ebé adekuadu atu rezolve problema hirak ne’e iha 2022,” nia hatutan.

Alende ne’e, Prezidente TR mós informa ba Prezidente Repúblika kona-ba planu kapasitasaun ba juiz sira iha rai-li’ur ne’ebé la konsega hala’o iha tinan ne’e tanba pandemia Covid-19 no hein bele realiza iha tinan oin.

Kona-ba progresu projetu konstrusaun edifisiu Tribunál Rekursu nian atinje ona 30%.

Prezidente Deolindo mós afirma, Tribunál Rekursu liuhosi Kámara Kontas aprova ona fornesimentu kombustivél ba sentru elétrika Hera no Betano no aprova mós rezultadu auditória   ba iha edifisiu Komisaun Funsaun Públika.

Nune’e, iha tinan 2020 to’o 2021, Tribunál Rekursu liuhosi Kámara Kontas aprova halo auditória ba projetu 10-resin, hosi númeru ne’e, haat mak iha ona faze final no selu sei oha prosesu auditória hela.

Jornalista : Natalino Costa

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here