Sekertáriu Estadu Jobentude no Desportu (SEJD), Abrão Saldanha simu dokumentus rehabilitasaun Jinasiu Dili husi representante kompania vitoria hafoin finalisa rehabilitasaun, segunda 6/12/2021. Imajen Tatoli/Antonio Goncalves

DILI, 06 dezembru 2021 (TATOLI)– Kompañia Victoria Construction Unipesoal Lda, segunda ne’e, ofisiálmente entrega ona projetu reabilitasaun Jináziu Dili ka Gedung Matahari Terbit (GMT) ba Governu liuhosi Sekretariu Estadu Juventude no Desportu (SEJD).

Projetu reabilitasaun ne’e hahú iha tinan 29 outubru 2019 to’o finaliza iha tinan ne’e (2021) tanba afeta hosi pandemia global ho fundu montante $412,595.61.  Ho orsamentu ne’e la sufisiente, nune’e  kompañia husu tan adisionál $33.000.

Notísia Relevante:  Kompañia Victoria Construction finaliza ona reabilitasaun Jináziu Dili

Kondisaun Jinaziu Dili hafoin kompania victoria finaliza reabilitasaun hodi entrega ba governu, segunda 6/12/2021.Imajen Tatoli/Antonio Gonclves

“Governu apresia tebes ho esforsu ne’ebé mak kompaña hala’o ho akompañamentu tékniku hosi Ministériu Obra Públiku no Ajénsia Dezenvolvimentu Nasionál (AND), nune’e, kompañia konsege finaliza duni reabilitasaun jináziu Dili ne’e,” Sekretariu Estadu Juventude no Desportu (SEJD), Abrão Saldanha, hateten iha intervensaun seremonia termu entrega, iha jináziu Dili.

Sekretária Estadu ne’e dehan, ho kondisaun jináziu Dili bele fasilita ona atividade desportu hotu iha kapitál nasaun ne’e ho di’ak.

Tuir kontratu, empreza sei iha responsabilidade durante fulan-neen atu halo manutesaun no retensaun bainhira sasán ruma falla.

“Kuandu liu ona fulan-neen mak ita foin simu totalmente, tanba ne’e pagamentu mós ita husik hela 5% hodi responde ba retensaun ne’ebé mak sei halo,” dehan Abrão.

Nune’e, Governante ne’e apela ba fedarasaun desportivu hotu atu uza fasilidade ho kuidadu hodi hamosu atleta sira ho kapasidade no abilidade di’ak atubele kompete iha internasionál.

SEJD sei kria regra utilizasaun liuliu halo jestaun ba fasilidade ka jináziu Dili atubele hatama reseita ba Estadu.

Iha biban hanesan, Tékniku Kompañia, Lourenco Oliveira, hateten, maski entrega ofisialmente ona, maibé sei iha responsabilidade durante fulan-neen hodi halo retensaun ka manutesaun.

“Ami garante fasilidade ne’e iha kualidade ba modalidade sira bele prátika desportu oin-oin iha ne’e,” nia dehan.

Entretantu, Prezidente Federasaun Volleyball Timor-Leste (FVTL), Inosençio de Araújo da Silva agradese ba Governu no kompañia tanba  kria ona kondisaun ne’ebé di’ak ba modalidade desportu sira ho di’ak.

“Agradese ba Governu ho kompaña bele finaliza ona reabilitasaun ne’e ho kualidade no fó espasu ona mai ami bele hala’o liga Volleyball nian iha ne’e,” nia afirma.

Notísia Relevante:  Kompañia Victoria Construction Sei Reabilita Jináziu Dili

Jornalista : Hortencio Sanchez

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here