Reasaun estudante ida bainhira simu vasina Pfizer COVID-19 iha Eskola São Pedro Comoro, Dili, tersa (16/11/2021). Imajen TATOLI/Antonio Gonçalves.

DILI, 06 dezembru 2021 (TATOLI)—Forum Organizasaun Naun Govermentál Timor-Leste (FONGTIL), halo monitórizaun ba vasina COVID19 hahú hosi 29 to’o 30 novembru iha munisípiu 11 ladún hatudu progresu pozitivu, tanba ladún iha kooperasaun no koordenasaun di’ak entre pesoál saúde ho lider komunitária sira.

“Jerálmente hosi dadus monitorizasaun loron tolu hosi 29-30 Novembru 2021, ladun hatudu progresu pozitivu, tanba ladun iha kooperasaun no koordenasaun ne’ebé di’ak entre servisu saúde ho lider komunitária, igreja no sosiedade sivíl hodi enkoraja no promove partisipasaun komunidade iha vasinasaun”, hateten Programa Maneger, Forum Organizasaun Naun Govermentál Timor-Leste (FONGTIL), Lourenço Tito, hateten liuhosi konferénsia imprensa ne’ebé hala’o iha salaun enkontru FONGTIL, Caicoli, Dili, segunda ne’e.

Hosi rezultadu monitorizasaun hatudu katak, maske partisipasaun tun-sa’e maibé rekoñese katak taxa partisipasaun aumenta makaas tebes, tanba komunidade balun ne’ebé mai simu vasina haree sira-nia maluk ne’ebé simu ona vasina kompletu rekoopera hosi moras ne’ebé durante ne’e sira sofre hanesan iis boot, ruin sin konsege kura no moras sira seluk tan.

Maske nune’e, sei iha preukupasaun ki’ik balun mak presiza fó atensaun, hanesan menus konsiénsia komunidade hodi uza máskara no distansiamentu sosiál iha maioria fatin fasilidade saúde bainhira asesu ba vasinasaun.

Kona-bá preukupasaun partisipasaun komunidade ne’ebé tun sa’e kada loron ne’e, nia hateten, ne’e deskobre iha sentru vasinasaun balun hanesan iha Becora, Ermera (Railaco) no Atauro, ho razaun tanba iha sentru vasina balun kuaze maioria komunidade simu ona vasina, maibé iha sentru vasina balun komunidade balun seidauk hakarak simu vasina ho razaun oioin.

Durante loron rua, hosi 29-30 Novembru 2021, taxa partisipasaun komunidade iha fasilidade sentru saúde no fatin vasinasaun hamutuk 37 mak hala’o hosi ONG 21, deskobre totál populasaun 3068 ho partisipasaun feto 62.29% nune’e mós hosi total partisipasaun mane hamutuk 37.71%.

Populasaun ne’ebé mak simu doze daruak hamutuk 59,58% no doze dahuluk hetan 40,42%. Aleinde ne’e, taxa partisipasaun Ema ho Defisiensia sira kontinua kiik nafatin iha monitorizasaun ba fatin vasina 37 iha munisipiu 11, inklui RAEOA durante loron 29 to’o 30 novembru 2021 ho totál ema ho defisiénsia simu vasina hetan ema na’in-tolu de’it iha munisípiu Lautém, Postu Administrativu Lospalos.

Hosi ne’e, partisipasaun feto iha vasina doze daruak aas liu ho persentajen 55,58% no partisipasaun mane iha vasina doze 2 hetan persentajen 44,42%. Aleinde ne’e, partisipasaun vasina doze dahuluk ne’e feto nafatin domina ho persentajen 52,26% no persentajen mane hamutuk 47,74%.

Hosi rezultadu monitorizasaun ne’e, FONGTIL rekomenda ba Ministerio Saúde atu bele konsidera mak iha sentru saúde ka vasinasaun balun ne’ebé ninia área kobertura atendimentu luan presiza aumenta pesoáll saúde ho ekipa suporta hosi autoridade lokál, veteranu no juventude sira hodi bele halo sosializasaun ba komunidade sira-ne’ebé hela fatin dook hosi fatin vasina (Sentru Saude Postu Iliomar).

FOMGTIL ezije nafatin ba pesoál saúde iha sentru saúde ka vasinasaun hotu atu tau atensaun ba implementasaun protokolu saúde nian, tanba iha monitorizasaun hatudu katak kuaze komunidade barak mak la uza ona máskara bainhira ba simu vasina.

Alende ne’e, Ministériu Saúde presiza simplifika prosesu atu hetan sertifikadu (internasional) vasina Covid-19 ba sidadaun sira iha munisípiu ne’ebé hakarak halo viajen ba rai liu atu nune’e sidadaun sira bele hetan iha sira-nia munisípiu no lalika mai trata iha kapital Dili.

Presiza aumenta fasilidade komputador iha sentru saúde ka vasinasaun sira iha munisípiu sira atu fasilita komunidade sira ho lalais hodi rejista iha sistema online.

Rekomenda nafatin ba Ministériu Saúde atu kria ekipa movel hosi pesoál saúde hamutuk ho xefe suku no aldeia hodi identifika uma Ema ho Defisiensia sira hodi bele ba fó vasina iha sira-nia hela fatin, tanba númeru Ema ho Difisiensia ne’ebé mai simu vasina iha sentru saúde ka vasinasaun sei kiik.

Rekomenda mós ba Ministériu Saúde atu sosiedade sivíl liu-liu FONGTIL atu apoiu Governu hodi halo kampaña ba hasa’e taxa partisipasaun vasinasaun nian.

“Ministériu Saúde presiza halo avaliasaun ba servisu apoiu lider komunitária atu haree progresu, vantagen no dezvantajen hosi meus sira ne’ebé antes ne’e fornese ona”, nia katak.

Rekomenda ba Servisu Saúde Munisipál atu halo monitorin no evaluasaun rutina ba postu no sentru saúde sira atu haree besik situasaun ne’ebé pesoál saúde sira enfrenta iha terenu.

 Entretantu, iha monitórizasaun ne’e, FONGTIL hala’o hahú hosi 29 to’o 30 novembru iha munisípiu 11, inklui RAEOA ho totál NGO hamutuk 21, hodi hala’o monitórizasaun ba fatin vasina hamutuk 37.

Jornalista : Nelia Fernandes

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here