Partisipante kompetisaun aptidaun nasionál ba da-VIII no ekipa juri sira hasai foto hamutuk hafoin ramata atividade, iha Sentru Formasaun Polísia, Comoro, segunda (07/12). Imajen TATOLI/Cidália Fátima

DILI, 06 dezembru 2021 (TATOLI)—Institutu Nasionál Dezenvolvimentu Mão-de-Obra (INDMO), realiza kompetisaun aptidaun nasionál ba da-VIII via virtuál, ne’ebé hafoin liuhosi prosesu naruk, ekipa juri deside sentru formasaun Carlos Gamba Kairiri Baucau sai vensedór ho pontu 88,72, ho osan $2.500.

Diretora INDMO, Isabel Fernandes de Lima, hateten, kompetisaun ne’e fó oportunidade ba foin-sa’e sira ho idade 18 to’o 25, hosi sentru formasaun Ensinu Sekundária Tékniku Vokasionál (ESTV) atu halo konkursu hasoru padraun nasionál iha área konstrusaun sivil hanesan, pedreira, soldadura, kanalizasaun, karpentaria no eletrisidade.

“Konkursu nasionál ba aptidaun virtuál ho objetivu jerál atu prepara Timor-Leste ba konkursu abilidade rejionál no mundiál, atu armoniza kualifikasaun nasionál Timor-Leste ho Asosiasaun Nasaun Sudeste Aziátiku (ASEAN, sigla inglés) no mundiál,” Diretora dehan iha ámbitu seremónia enserramentu kompetisaun, iha Sentru Formasaun Polísia (CFP, sigla portugés), Comoro, segunda ne’e.

Notísia relevante: INDMO realiza konkursu nasionál aptidaun liuhosi virtuál

Kompetisaun ne’e partisipa hosi sentru formasaun sira hanesan CNEFP Tibar, CNFP Becora, Sentru treinamentu Don Bosco Comoro, Sentru formasaun Ir. Carlos Gamba Kairiri, Gariuai, Baucau no CTC.

Enkuantu, vensedór daruak iha kompetisaun ne’e mak CNEFP Tibar ho pontu 86,52 no hetan osan hamutuk $1,500 no vensedór datoluk mak CTC Salele Covalima ho pontu 85,09, hetan osan hamutuk $1.000.

Nune’e, kompetitór seluk ne’ebé la sai vensedór hetan mós osan ho valór $500, nu’udar aktu apresiasaun tanba partisipa ona iha eventu nasionál ne’e.

Aleinde fó osan, atribui mós sertifikadu apresiasaun ba kompetitór sira no juri na’in-hitu.

Tuir Diretora institutu, INDMO ninia knaar mak hanesan orgaun reguladora, atu halo difinisaun padraun kompeténsia liuhosi prepara profisionál sira no fó sertifikasaun ba sentru formasaun sira.

“Bainhira prepara padraun sira hotu, INDMO tenke prepara teste ninia kontíudu kualifikasaun. Tanba ne’e, institutu atu konfirma kompeténsia sira ne’e uza ho di’ak ka lae, liuhosi kompetisaun ida-ne’e. Konkursu ne’e tenke halo atu garante kualifikasaun durante ne’e, ne’ebé prepara la’o tuir duni prosedimentu,” nia akresenta.

Iha biban hanesan, Esperança Luisa Correia, nu’udar mellór vensedora feto, ne’ebé mai hosi sentru Sentru formasaun Ir. Carlos Gamba Kairiri, Gariuai, munisípiu Baucau, sente orgullu tebes tanba bele sai manan-na’in ba kategoria feto.

“Ha’u haksolok tebes no ha’u la espera bele sai manan-na’in. Tanba ne’e, ha’u hakarak husu ba maluk feto sira katak labele moe bainhira apreende iha área konstrusaun jerál nian,” Esperança Luisa hameno.

Durante kompetisaun, vensedora ninia área espesialidade maka karpentaria, nune’e obra ne’ebé nia prodús hodi kompete mak halo meza ida no kadeira rua. Aleinde ne’e ajuda mós ninia kolega sira seluk hanesana pedreiru, kanalizasaun, eletrisidade no soldadura.

Governu liuhosi INDMO no parseiru dezenvolvimentu sira garante estabelese sistema formasaun profisionál ne’ebé forte no kualidade hodi responde ba nesesidade no demanda merkadu traballu iha rai-laran no mós rai-li’ur.

Aleinde ne’e, atu hasa’e kompreensaun reprezentante Governu no indústria sira kona-ba importánsia hosi edukasaun vokasionál no fomasaun profisionál, atu hasa’e konsiénsia foin-sa’e sira no hirak ne’ebé influénsia ba oportunidade iha abilidade profisionál.

Nune’e mós, atu hasa’e oferta ba empreza sira, indústria no área servisu, inklui oportunidade atu hasoru no rekruta ema hirak ne’ebé iha abilidade exelente.

Objetivu espesífiku mak atu teste kualidade no integridade hosi estrutura kualifikasaun nasionál Timor-Leste, ne’ebé estabelese ona, fornese oportunidade ba sentru formasaun akreditadu no ESTV sira atu demonstra abilidade iha área espesífiku.

Aleinde ne’e, atu promove partisipasaun foin-sa’e feto Timor-Leste iha área servisu konstrusaun nian no fó oportunidade ba sentru formasaun akreditadu no ESTV sira atu kompete hasoru padraun industriál nasionál, rejionál no internasionál.

Jornalista : Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here