Imajen/Mídia PR.

DILI, 06 dezembru 2021 (TATOLI)—Reprezentante povu iha uma fukun Parlamentu Nasionál segunda ne’e, aprova proposta Orsamentu Jerál Estadu (OJE) 2022 ba Ministéiru Koordenadór Asuntu Ekonómiku (MEKAE) ho montante $1,653,170 iha espesialidade ho rezultadu votasaun a-favór 35, kontra 17 no abstensaun 10.

Notísia Relevante: Ohin, PN-Governu debate proposta lei OJE 2022 iha espesialidade   

“Nune’e orsamentu ba MKAE pasa,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária Parlamentu Nasionál iha debate proposta OJE 2022 ba loron dahuluk iha Parlamentu Nasionál.

Iha debate ne’e, iha proposta númeru 16 hosi Deputada proponente Maria Angélica Rangel da Cruz ho Maria Angelina Sarmento kona-ba kategória despeza iha transferénsia públika, programa ho kódiku 983 investimentu no diversifikasaun ekonómika, dotasaun inisiál kategória $50.000, alterasaun aumenta $450.000, ho ida-ne’e dotasaun finál ba kategória $500.000.

Tuir proposta ne’e ho justifikasaun adisionál ho montante $450.000 ida-ne’e presiza aumenta hodi fó apoiu atu finansia ba mikro pequena no media ho grande empreza.

Proposta ne’e aprovadu ho rezultadu votasaun a-favór-31, kontra 23 no abstensaun ualu (8), nune’e proposta númeru 16 ne’e pasa hodi alteradu.

Ministéiru Koordenadór Asuntu Ekonómiku (MEKAE) prevee $1,653,170, aloka ba saláriu vensimentu $162,277, bens servisu $440,893, kapitál menór no kapitál dezenvolvimentu laiha, transferénsia públika $50,000, no orsamentu ne’e hodi finansia ba programa rua (2), sub-programa tolu (3) no atividade 12.

Programa boa-governasaun no jestaun instituisionál sei gasta $531,211 no programa investimentu no diversifikasaun ekonómia sei gasta $1,121,959.

Programa boa-governasaun no jestaun instituisionál ho nia sub-programa ida (1) no atividade haat (4).

Programa investimentu no diversifikasaun ekonómia ho nia sub-programa polítika ekonómika nia atividade mak monitorizasaun ba negósiu kiik rurál hodi finansia liuhosi subvensaun públika, atividade koordenasaun polítika departamentu ministeriál no ajénsia tutela, atividade diseminasaun informasaun kona-bá atividade ekonómika.

Atividade halo koordena, monitoriza no avalia implementasaun planu rekuperasaun ekonómiku, atividade dezenvolvimentu no kapasitasaun setór privadu iha área ekonómia no institui instrumentu apoiu ba finansiamentu mikro kiik, médiu no empreza boot.

Atividade koordena no akompaña servisu no polítika governamentál dezenvolvimentu setór privadu no kooperativa.

Sub-programa diversifikasaun ekonómia ho nia atividade koordenasaun, sosializasaun no desiminasaun ba dezenvolvimentu komérsiu, atividade konsege no promove polítika diversifikasaun ekonómia.

Jornalista : Nelson de Sousa

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here