Eis Prezidente Komisaun C-PN, Fernanda Lay. Imajen Tatoli/António Gonçalves.

DILI, 06 dezembru 2021 (TATOLI)—Bankada opozisaun iha Parlamentu Nasionál liuhosi Partidu Kongressu Nasionál Rekonstrusaun Timorense (CNRT), hato’o proposta adita perímetru orsamentál iha proposta lei Orsamentu Jerál Estadu (OJE) 2022.

Notísia Relevante: Ohin, PN-Governu debate proposta lei OJE 2022 iha espesialidade   

Iha proposta hosi Deputada CNRT, Maria Fernanda Lay, Proposta aditamentu iha artigu 4 ‘Definisaun’ proposta lei númeru 35/V (4a) adita alínea dd) ho redasaun ‘Perímetru Orsamentál, konjuntu entidade dotasaun orsamentál abranje hosi orsamentu Estadu.

Justifikasaun sumária, la existe definisaun kona-ba Périmetru Orsamentál iha Proposta lei 35/V (4a) OJE 2022 iha lei númeru 13/2009 Orsamentu no Jestaun Finanseira, nune’e entende proponente presiza introdús definisaun ho objetivu klarifika termu.

“Proposta ne’e hakarak ajuda Governu esplika ba públiku tanba ema hotu hatene Périmetru Orsamentál ho razaun ida-ne’e mak adita tan objetivu ajuda reprezentante povu entende,” Deputada Maria Fernanda Lay hateten iha plenária Parlamentu Nasionál, iha debate proposta OJE 2022 iha faze espesialidade ba loron dahuluk, segunda ne’e.

Ministru Finansa, Rui Augosto Gomes, fó resposta katak PPL ne’e defaktu la define konseitu perímetru orsamentál tanba sai ona hanesan kuñesimentu públiku OJE, nune’e laiha nesesidade atu integra.

Tanba ko’alia kona-ba perímetru orsamentál refere ba regra sira-ne’ebé estabelese entidade públika sira-ne’ebé integra ka la integra iha OJE ka périmetru OJE.

Inklui entidade sira-ne’ebé integra setór públika administrativu no esklui entidade sira-ne’ebé la integra iha setór públiku administrativu mezmu sira hola parte iha setór públiku hanesan empreza públika, fundasaun, asosiasaun públika.

“Agora iha parte definisaun ida ne’e inklui de’it konseitu tékniku sira-ne’ebé defisíl atu komprende ida-ne’e mak ita hatama iha ne’eba no proposta distinta deputada aprezenta mai ami sente katak definisaun seidauk kompletu. Se iha mudansa definisaun ne’e mak karik Governu bele tetu atu simu. Tantu ami bele propoin definisaun ida loos liu konjuntu entidade dotasaun orsamentál kestaun abranje OJE, ezemplu ita bele tau konjuntu entidade presiza integra OJE. Se definisaun klaru. Ida-ne’e mak inklui konseteza proposta ne’e bele aseita, maibé ladún kompletu tanba ne’e mak pozisaun,” nia esplika.

Prezidente Komisaun A, Joaquim dos Santos, aseita ho rasosinu Governu nian nune’e laiha nesesidade atu hatama termu perímetru orsamentál ne’e, tanba prátikamente konseitu ekonómiku karik konkorda fraze di’akliu hanesan Governu aprezenta tenke uza termu lei no bele mós iha lei seluk ajuda interpretasaun.

Hafoin ho resposta Governu nian, deputada proponente pronunsia retira fila-fali proposta ne’e.

“Abranje tuir lei OJE hanesan maibé atu fó hanoin definisaun iha LOGF mós laiha, tanba ne’e proposta ne’e hakarak atu tau perímetru orsamentál ne’e maibé la konkorka, nune’e proponente deside retira,” Maria Fernanda Lay hateten.

Nune’e, reprezentanta povu halo votasaun ba artigu 4 ‘Definisaun’ ho rezultadu votasaun a-favór 39, kontra 0 no abstensaun 24.

“Nune’e artigu 4 proposta lei pasa,” Prezidente Parlamentu Nasionál, Aniceto Longuinhos Guterres Lopes anunsíu liu plenária.

Alleinde ne’e, reprezentante sira aprova mós Proposta Projetu de Lei (PPL) hosi Kapítulu I dispozisaun inisiál artigu 1 Objetu no ambitu, atigu 2 Rejime finanseiru, artigu 3 Orsamentasaun.

Ho rezultadu votasaun a-favór- 41, kontra ida (1) no abstensaun 18, nune’e proposta lei hosi artigu tolu ne’e pasa.

Jornalista : Nelson de Sousa

Editór        : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here