Ámbitu debate no votasaun Proposta Lei OJE 2022 iha faze espesialidade, iha sala plenária PN, segunda (06/12). Imajen TATOLI/Egas Cristóvão.

DILI, 06 dezembru 2021 (TATOLI)—Parlamentu Nasionál (PN) liuhosi diskusaun Proposta Lei Orsamentu Jerál Estadu (OJE) 2022 iha faze espesialidade, aprova orsamentu Gabinete Primeiru-Ministru (GPM) ho montante $4.915.494, ho rezultadu votu a-favór 39, abstensaun 17 no kontra 2.

“Nune’e orsamentu ba Gabinete Primeiru-Ministru pasa,” Prezidente Parlamentu Nasionál (PPN), Aniceto Guterres, deklara iha sala plenária, segunda ne’e.

Hosi totál orsamentu ne’e, aloka ba kategoria saláriu no vensimentu $516.733, bens no servisu $3.186.761, kapitál menór $150.000, kapitál dezenvolvimentu $252.000 no transferénsia públika $750.000.

Notísia relevante: OJE 2021: GPM millaun $10,2 korresponde ba programa haat

Orsamentu GPM ba tinan 2022 atu finansia ba programa prioridade rua hanesan seguransa nasionál $60.000 no boa-governasaun no jestaun institusionál $4.855.494.

GPM no ajénsia sira ne’ebé tutela sei implementa programa hanesan igualdade jéneru no inkluzaun, kultura no patrimóniu, no telekomunikasaun.

Nune’e, totál alokasaun millaun $9,3 fahe ba parte rua hanesan GPM millaun $4,9 no seluk ba Gabinete Vise Primeiru-Ministru primeiru no segundu, Sentru Integradu Jestaun Krize no Unidade Planeamentu Monitorizasaun no Avaliasaun (UMPA).

Enkuantu ba Gabinete Apoiu Sosiedade Sivíl hetan alokasaun millaun $4,4 hodi apoiu servisu sosiedade sivíl no auditória sosiál.

Primeiru-Ministru hanesan orgaun soberania responsável  kondusaun no ezekusaun polítika jerál nasaun no orgaun superiór administrasaun públika (artigu 103º Konstituisaun).

Aleinde ne’e, hanesan ba xefia Governu, prezide Konsellu Ministru, dirije no orienta polítika jerál Governu no koordena asaun ministru sira, laiha prejuízu responsabilidade direta ba respetivu departamentu governamentál informa ba Prezidente Repúblika kona-ba asuntu relativu polítika interna no esterna hosi Governu, ezerse funsaun atribui hosi Konstituisaun (artigu 117.º Konstituisaun).

Jornalista : Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here