Ámbitu debate no votasaun Proposta Lei OJE 2022 iha faze espesialidade, iha sala plenária PN, segunda (06/12). Imajen TATOLI/Egas Cristóvão.

DILI, 06 dezembru 2021 (TATOLI)—Parlamentu Nasionál (PN) liuhosi diskusaun Proposta Lei Orsamentu Jerál Estadu (OJE) 2022 iha faze espesialidade, aprova orsamentu Prezidénsia Konsellu Ministru (PCM, sigla portugés) ho montante $4.717.347, ho rezultadu votu a-favór 41, abstensaun 16 no kontra 4.

“Orsamentu ba Prezidénsia Konsellu Ministru pasa iha espesialidade,” Prezidente Parlamentu Nasionál (PPN), Aniceto Guterres, deklara, liuhosi sala plenária, PN, segunda ne’e.

Hosi totál alokadu fahe ba kategoria saláriu no vensimentu $551.540, bens no servisu $3.760.619, enkuantu kapitál minór, kapitál dezenvolvimentu no transferénsia públika laiha.

Aleinde ne’e, orsamentu ne’e hodi finansia programa rua hanesan Reforma Estadu ho montante $405.188, ho nia objetivu médiu prazu (outcome) administrasaun públika efisiénte no transparante, enkuantu Boa Governasaun no Jestaun Instituisionál $4.312.159 no sub-programa ualu inklui atividade 32.

Notísia relevante: PCM propoin millaun $5 iha proposta OJE 2021

Sub-programa sira hanesan reforma administrativa, atividade planu desburokratizasaun administrasaun públika, atividade apoia servisu no orgaun administrasaun efisiénsia prosedimentu, elabora proposta revizaun polítika nasionál fortalesimentu institusionál, elaborasaun proposta prosedimentu komunikasaun instituisionál.

Ba programa Boa Governasaun no Jestaun Instituisionál, ho objetivu médiu prazu konstrui konfiansa Governu, ho ninia sub-programa boa-governasaun no nia atividade planeamentu dezenvolvimentu estratéjiku no orientasaun polítika, inspesaun fiskalizasaun no auditoria.

Sub-programa jestaun instituisionál nia atividade jestaun finanseira administrasaun no lojístika, jestaun patrimóniu no seluk tán.

Sub-programa parseria ho atividade kooperasaun no parseria no sub-programa apoiu ba Primeiru-Ministru iha koordenasaun Governu no Prezidénsia Konsellu Ministru ninia atividade mak apoiu Primeiru-Ministru no koordenasaun Governu, reprezentasaun Konsellu Ministru no Primeiru-Ministru, koordenasaun Prezidénsia Konsellu Ministru.

Sub-programa governasaun legál Konsellu Ministru ninia atividade koordenasaun apoiu konsulta jurídika Konsellu Ministru, koordensaun prosedimentu lejíslativu no regulamentu Governu, ezekusaun polítika Governu iha matéira reforma lejíslativa ho seluk tan.

Sub-programa prestasaun servisu tradusaun no sub-programa komunikasaun estratéjika Governu no promosaun sidadania ho nia atividade elaborasaun no desiminasaun atividade Governu, monitorizasaun imprensa ho sira seluk.

PCM aprezenta OJE 2022 ho estimativa forsa traballu funsionáriu 116, kompostu hosi mane 73 no feto 43), inklui funsionáriu 16 ho kargu dirasaun no xefia, hosi efetivu sira-ne’e la inklui funsionáriu nomeasaun polítika.

Ministériu ne’e hanesan departamentu sentrál Governu ne’ebé iha misaun presta apoiu ba Konsellu Ministru no Primeiru-Ministru, promove koordenasaun interministeriál ba Governu hanesan prosedimentu lejislativu Governu (artigu 2º Dekretu-Lei númeru 16/2018, 12 dezembru).

Jornalista : Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here