Ministru Administrasaun Estatál, Miguel Pereira de Carvalho, Ministru Edukasaun Joventude no Desportu (MEJD), Armindo Maia, hamutuk ho entidade relevante diskute medida ba analfabetizmu iha país, iha salaun MEJD, Villa verde, segunda (06/12). Imajen TATOLI/Egas Cristóvão

DILI, 06 dezembru 2021 (TATOLI)—Ministériu Administrasaun Estatál (MAE) no Ministériu Edukasaun, Juventude no Desportu (MEJD) sei kolabora hamutuk kombate analfabetizmu liuhosi formasaun iha territóriu tomak iha tinan oin.

“Ita sei hala’o programa iha aldeia no suku sira, nune’e populasaun ne’ebé seidauk hatene lee no hakerek bele konsentra ho di’ak. Tanba programa ne’e ninia lei no polítika aprova hosi Ministériu Edukasaun, Juventude no Desportu, maibé implementasaun halo hamutuk,” Ministru Administrasaun Estatál, Miguel Pereira de Carvalho, informa iha salaun enkontru MEJD, iha Villa verde, segunda.

Ba inisiativa ne’e, MAE sei prevee orsamentu $300.000 atu kontratu formadór halo formasaun iha munisípiu 12 la inklui Ataúro.

Tuir relatóriu peskiza ne’ebé United Nations Educational, Scientific and Cultural Organization (UNESCO) rekolla iha tinan 2018, populasaun ho idade indultu maizumenus 1.268.000, iha 404.872 mak lahatene lee no hakerek ka reprezenta 31,93% hosi totál populasaun adultu.

“Programa kombate analfabetizmu iha territóriu nasionál hanesan planu integradu entre liña ministeriál, tanba programa ne’e rasik la hanorin iha eskola, maibé tenke halo iha komunidade nia le’et. Tanba ne’e, presiza esforsu parte hotu atu kombate no luta hasoru problema boot ne’e,” Ministru subliña.

Notísia relevante: TL la komemora loron mundiál alfabetizasaun tanba COVID-19

Hosi planu ne’ebé iha entre liña ministeriál hotu, deside katak planu kurtu prazu 2021-2023, ne’ebé hanesan mehi boot mak hakarak redús númeru la hatene lee no hakerek, hosi 31,93% tun ba 21%.

“Atu nune’e, ba médiu prazu iha tinan 2026, taxa iliteradu bele redúz tan 11%, signifika iha 2026 taxa literadu sei sa’e 89%. Enkuantu ba tinan 2026-2030, númeru analfabetizmu iha territóriu nasionál bele redús ba 0%, signifika metade populasaun 404.872 ne’ebé la hatene lee no hakerek  bele hatene ona hakerek numerasia bázika,” governante ne’e otimista.

Papél MAE iha programa kombate analfabetizmu ne’e atu koordena no garante administrasaun munisipál no autoridade munisipál sira simu kompeténsia halo jestaun programa analfabetizmu iha munisípiu sira, ne’ebé kompeténsia serbisu sira bazeia ba dekretu-lei númeru 3/2016, ne’ebé aprova estatutu administrasaun estatál no autoridade munisipál.

Programa ne’e inisia hosi MEJD, ne’ebé deskonsentra ona iha munisípiu sira dezde tinan haat liubá kotuk.

Analfabetizmu kontinua sai problema boot iha Timor-Leste

VIII Governu Konstitusionál liuhosi MEJD no MAE inklui ajénsia dezenvolvimentu sira iha área edukasaun, tau hamutuk forma koligasaun atu funu hasoru analfabetizmu iha Timor-Leste iha tinan oin.

Nune’e, Ministru Edukasaun, Juventude no Desportu, Armindo Maia, konsidera analfabetizmu kontinua sai problema boot iha Timor-Leste, tanba  to’o agora reprezenta kuaze metade hosi totál populasaun ho idade adutu.

“Persentajen ne’e boot tebes, tanba ne’e presiza fó liman ba malu entre ajénsia Governu no ajénsia internasionál sira tanba ita-nia planu Objetivu Dezenvolviment Sustentável (ODS) to’o 2030 tenke atinje, katak iha tinan ne’e país ida tenke livre ona hosi analfabetizmu. signifika laiha tan populasaun adultu ida maka la hatene lee no la hatene hakerek,” Ministru dehan.

Tuir governante ne’e, programa literasia alfabetizasaun hahú kedan iha tinan 1974, ne’ebé momentu ne’ebá ASDT/FRETILIN lansa programa ne’e to’o kedan baze de apoiu, hafoin iha era ukun-an ne’e hahú hosi I Governu Konstitusionál serbisu hamutuk ho Governu Brazíl hodi hala’o programa alfabetizasaun solidária inklui Governu Cuba.

“Maski programa ne’e hala’o hela, maibé neneik loos. Entaun ita presiza tau forsa hamutuk hodi lori programa ne’e ba oin tuir meta ne’ebé ita hakarak atu kombate zero analfabetizmu,” Ministru enkoraja.

Jornalista : Tomé Amado

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here