Ministru Turizmu, Komérsiu no Indústria, José Lucas do Carmo Da Silva. Imajen TATOLI/Francisco Sony

DILI, 06 dezembru 2021 (TATOLI)–Ministériu Turizmu, Komérsiu no Indústria (MTKI) hamutuk ho liña ministeriál foin lalais ne’e diskute kria konseitu no divulga informasaun liuhosi talk show, ligadu ho utilizasaun tais ba uniforme nasionál.

Ekipa ne’ebé halo diskusaun kompostu hosi MTKI, Komisaun Funsaun Públiku (CFP, sigla portugés), Ministériu Edukasaun, Juventude no Desportu (Ensinu Báziku no Superiór), Sekretaria Estadu Arte Kultura (SEAK), Ministériu Agikultura no Peska (MAP), Ministériu Administrasaun Estatál (MAE), Gabinete Prezidente Repúblika, Gabinete Primeiru-Ministru, UNESCO Antenna Office-Timor-Leste National Commission for UNESCO-TL, Timor Aid no Fundasaun Alola.

Tuir Ministru Turizmu, Komérsiu no Indústria, José Lucas do Carmo da Silva, kestaun ne’e liga ho Diresaun Jerál Indústria no Diresaun Nasionál Indústria Manufatura, ne’ebé ninia papel halo promosaun indústria manufatura iha rai-laran inklui produtu tais ne’ebé atu promove.

“Maibé asuntu transversál ba ministériu ida de’it mak halo, tanba ne’e maka orienta Diretór Jerál inklui Diresaun Nasionál ninia ekipa atu diskute ho liña ministériál,” Ministru José Lucas, hateten ba Agência TATOLI, iha resintu Parlamentu Nasionál, segunda ne’e.

Notísia relevante: MTKI halo preprasaun téknika uza tais sai uniforme nasionál

Nune’e, ekipa sira sei estabalese uluk konseitu ida molok lori ba Konsellu Ministru hodi hetan deliberasaun.

“Dadaun ne’e, iha diskusaun nia laran atu hetan konsensu hodi prodús dokumentu molok hetan deliberasaun hosi ezekutivu sira. Bazeia ba diskusaun sira, iha posibilidade uza tais ba uniforme funsionáriu públiku no estudante sira,” governante ne’e akresenta.

MTKI nu’udar instituisaun Governu ne’ebé inisia programa uniforme nasionál ne’e, tanba ne’e ekipa téknika sei aprezenta rekomendasaun ba ezekutivu sira.

Enkuantu, utiliza tais Timór ba uniforme nasionál fó biban hodi konsolida no promove nafatin identidade Timor-Leste nian, tantu iha rai-laran no ba mundu internasionál.

Aleinde ne’e, programa materiál tais sai nu’udar uniforme ofisiál, bele tulun empreza tais sira no loke tan kampu serbisu, liu-liu ba inan feton sira iha área rurál.

Jornalista : Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here