Prezidente Komisaun Organizadora Jogu Komunitária iha postu administrativu Maliana, munisípiu Bobonaro, Tomás Laco-Loe. Imajen Tatoli/Sérgio da Cruz.

BOBONARO, 06 dezembru 2021 (TATOLI) – Prezidente Komisaun Organizadora ba jogu komunitária iha postu administrativu Maliana, munisípiu Bobonaro, Tomas Lacu Loe, fó-sai katak komisaun sei halo  abertura jogu komunitária iha loron 08 dezembru.

“Ami-nia preparasaun másimu ona tanba komisaun forma iha fulan kotuk ne’e, ne’ebé ami-nia planu katak postu Maliana abertura jogu komunitária loron kuarta,” nia ko’alia iha salaun administrasaun munisípiu Bobonaro, segunda ne’e.

Administradór postu Maliana ne’e hatutan, daudaun komisaun simu ona lista hosi suku hirak-ne’ebé atu partisipa eventu jogu komunitária ne’e.

Purtantu modalidade futeból totál klubu ualu (8) mak preparadu ona atu kompete mai hosi suku hitu (7) inklui klubu ida hosi jogadór veteranu sira.

Enkuantu modalidade voleiból hamutuk klubu 14 mak preparadu ona atu kompete, komposta hosi klubu feto hitu no mane hitu. Modalidade atletizmu kilómetru lima válidu ba feto no kilómetru hitu válidu ba mane hosi suku hitu.

“Ita-nia jogadór sira-ne’e mai hosi suku Lahomea, Ritabou, Raifun, Odomau, Holsa, Tapo-Memo no suku Saburai, ne’ebe agora ami halo ona koordenasaun ho Asosiasaun Futeból Bobonaro, Asosiasaun Voleiból no Asosiasaun Atletizmu, no agora orsamentu ami aloka hotu ona ba sira atu fasilita arbritajen atu mai dirije jogu ne’e to’o remata,” nia katak.

Nia apela ba joven sira iha postu administrativu Maliana, atu aproveita oportunidade ne’e ho di’ak, hatudu jogu ho disiplina no vontade nune’e bele sai jogadór ne’ebé kualidade hodi reprezenta Maliana no munisípiu nia naran ba kompete iha nível nasionál.

“Governu mós presiza halo programa ne’e ho kontinuasaun, nune’e bele motiva ita-nia joven sira iha suku kria pás no establidade nomoos ita bele hetan jogadór di’ak, tanba durante ne’e ita-nia joven barak iha skill, maibé la hetan oportunidade,” nia dehan.

Entretantu Postu administrativu Maliana, hetan alokasaun orsamentu hosi Sekretaria Estadu Juventude no Desportu (SEJD) ho totál $5.773, montante ne’e fahe ba parte rua $3,400 gasta ba prémiu no $2,373 gastu ba nesesidade atividade.

Tuir Mataladan jogu komunitáriu nian katak, modalidade futeból primeiru lugár sei hetan prémiu osan $400, segundu lugár $300 no terseiru lugár $250.

Ba modalidade voleiból feto, primeiru lugár hetan $300, segundu lugár $250 no terseiru lugár $250. Prémiu ne’e aplika mós ba mane.

Purtantu modalidade atletizmu kilómetru lima (5) validade ba feto, primeiru lugár hetan $150, segundu lugár $100 no terseiru lugár $75. Prémiu ne’e aplika mós ba mane ho distánsia kilómetru hitu (7).

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here