CCLN no Polísia forensik entrega restu mortál saudozu João Dias Quintas Vaz ba família. Imajen/ Felicidade Ximenes.

DILI, 06 dezembru 2021 (TATOLI)— Governu liuhosi Konsellu Kombatente Libertasaun Nasionál (CCLN,sigla portuges) ho Polísia Nasionál Timor-Leste (PNTL) liuhosi Unidade FORENSIK entrega restu mortál saudozu João Quintas Vaz ‘Russo” ba família atu hala’o serimonia transladasaun ka haloot tuir kultura munisípiu Lautém.

Serimonia transladasaun restu mortál saudozu “Russo” sei hala’o iha knua Narun-teino, aldeia Soruwaku, suku Mahina I, Postu Administrativu Lautém, Munisípiu Lautém.

Saudozu moris iha loron 23 setembru 1961, knua Narun-teino, aldeia Soruwaku, suku Mahina I. 

Durante okupasaun Indonézia, saudozu hala’o serbisu iha Kruz Vermella Internasionál ka International Committee of the red Cross (ICRC) hodi fó apoiu umanitáriu ba Timor-oan sira liuliu FALINTIL liuhosi hosi rede klandestina.

Família lori fotografia no ai-funan hodi akompaña restu mortál saudozu João Dias Quintas Vaz. Imajen/ Felicidade Ximenes.

Nune’e, tropa Indonézia deteta no halo kapturasaun hodi oho no hakoi saudozu, iha loron 10 setembru 1999, iha área Badumerah-motain, postu administrativu Balibo, munisípiu Bobonaro.

Reprezentante CCLN, Jorge Martins, hateten fó onra ba saudozu tanba fó nia kontribuisaun ba luta hodi liberta rai hosi okupasaun illegal Indonézia.

“Ha’u reprezenta Governu atu hato’o ami-nia agradesimentu ba entidade hotu-hotu no hato’o sentidu kondelénsia ba família enlutada,  ne’ebé durante ne’e  koopera hamutuk ho Governu hodi bele entrega restu mortál  saudozu João Quintas Vaz ba nia  família atu haloot ba fatin ikus nian,” Reprezentante (CCLN,  Jorge Martins, hateten hafoin entrega restu mortál ba família iha kapela Hospitál Nasionál Guidu Valadares (HNGV), Dili, segunda ne’e.

Iha fatin hanesan, Ofisiál Forensik PNTL, Inspetór Xefe, Mozinho Correia, esplika, restu mortál saudozu nia rekolla hosi  CCLN iha Balibo, hafoin kontaktu direita ba Kruz Vermella Timor-Leste, manda karta ba komandu PNTL hodi fó orden ba ekipa Forensik hodi ba foti restu mortál hodi halo ezaminasaun.

“Ita rekolla restu mortál no hahú hala’o ezaminasaun  ba ruin no rekolla mós informasaun hosi sasin no família hafoin ita halo konklusaun katak saudozu nia restu mortál mak ne’e duni  hodi entrega ba família” nia akresenta.

PNTL mós agradese família hotu, sasin sira no CCLN apoia no oferese informasaun hotu hodi halo ezaminasaun ba restu mortál saudozu nian durante tinan ida.

Entretantu, Oan hosi saudozu, Melkyour Dias Quintas Vaz, hato’o agradesementu ba Governu liuhosi CCLN no PNTL ne’ebe konsege rekolla saudozu nia restu mortál hodi entrega ba família.

“Ami família agradese tanba ho esforsu no serbisu voluntariamente rekolla, ami-nia aman nia restu mortál. Ami nia aman restu mortál rekolla iha tinan 2015 no prosesu ezaminasaun natoon ona hodi simu ami-nia aman  hodi ba haloot iha nia rai moris fatin,’’ Oan hosi saudozu, hateten ho mata-been.

Hafoin entrega saudozu ‘Russo’ ba família iha HNGV, kontinua lori soudozu ba vizita ikus edifisiu ICRC Timor-Leste nuudar serbisu fatin iha tempu okupasaun Indonezia hodi fo omenajen ikus ba saudozu nia restu mortál. Daudaun saudozu nia restu mortál deskansa iha oan-mane nia rezidénsia, Taibesi-Dili.

Tuir orariu, iha loron tersa (07/12), família saudozu sei trasporta restu mortál ba Komite Sentral FRETILIN (CCF, sigla portuges) hodi fo omenajen ikus. Hafoin realiza misa requiem iha Igreja Paróku Bekora no lori hikas ba uma Taibesi.

Iha loron kurta (08/12), família sei trasporta saudozu nia restu mortál ba iha Luro, munisípiu Lautem no iha loron 10 novembru haloot Sauzodu ba deskansa ikus nian iha knua Narun-teino.

Jornalista : Felicidade Ximenes

Editór      : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here