Diretora Ezekutiva Fundasaun Uma Pas Baucau, Felismina Belo. Imajen Tatoli/Natalino Belo.

BAUCAU, 06 dezembru 2021 (TATOLI) – Fundasaun Uma Paz iha munisípiu Baucau, hamosu departamentu ida kona-ba Programa Asisténsia Legál (PAL) hodi akompanã vítima sira-nia kazu bainhira tama iha Ministériu Públiku no Tribunál.

Diretora Ezekutiva Fundasaun Uma Paz Baucau, Felismina Belo, esplika, razaun hamosu Programa Asisténsia Legál tanba presiza iha akompanãmentu vítima sira iha uma-mahon ba Ministériu Públiku (MP) no Tribunál inklui monitoriza prosesu kazu hodi hein desizaun no lori ba fatin hakmatek.

“Importante ami halo simulasaun ba iha Ministériu Públiku no fó konsellu kona-ba lei tanba dalabarak feto maluk no oan sira-ne’ebé ba Ministériu Públiku no tribunál susar tebes, nune’e programa ne’e importante liu atu halo prepara-aan ba julgamentu,” Diretóra Ezekutiva Fundasaun Uma Paz Baucau, Felismina Belo, ko’alia iha Baucau, segunda ne’e.

Nia dehan, programa ne’e mosu atu ajuda populasaun sira-ne’ebé vulnerável liu tanba vítima sira mai hosi suku ne’e presiza gastu boot entaun advogadu sira ajuda haree parte ne’e inklui mós ba prosesu kazu sívil, liuliu kazu paternál.

Programa refere hahú iha loron 1 outubru, ne’ebé hala’o serbisu hamutuk ho Asisténsia Legál ba Feto no Labarik (ALFeLa), Ministériu Solidariedade Sosiál no Inkluzaun (MSSI), Vulnerável Polísia Unit (VPU), Igreja, PRADET no Orfanatu sira.

Uma Paz ne’e  dezde fulan-outubru to’o oras ne’e fó asistensia legál iha Tribunál hamutuk kazu 17 no antes ne’e serbisu hamutuk ho ALFeLa fo asisténsia legál hamutuk kazu 32.

Hosi númeru 32, kazu paternál hamutuk lima (5) mak rezolve ona no agora iha ona atensaun ba vítima liuhosi númeru bankária ne’ebé loke hosi advogadu sira.

Iha tinan 2021 rejista kazu hamutuk 106, hanesan kazu minoridade hamutuk 24 no kazu seluk sei prosesu iha Ministériu Públiku, kazu 32 iha ona Tribunál. Nune’e mós vítima ne’ebé hela iha uma-mahon na’in-10 no seluk reintraga ona ba família.

“Ita indentifika kazu mosu tanba ekonomia família nian, seluk mak joven kaben sedu, laiha planu atu haree labarik, organiza família tanba ne’e mak joven kaben sedu sai abut ba violénsia doméstika,” nia argumenta.

Uma Paz halo prevensaun violénsia doméstika liuhosi Programa Asisténsia Legál (PAL) hanesan fó edukasaun sívika kona-ba prevensaun joven kaben sedu ka soe bebé no prepara módul atu fahe ba joven inklui inan-aman sira hanesan parte prevensaun.

Área ne’ebé risku ba violénsia doméstika hanesan postu administrativu Quelicai, Venilale, Baucau Vila. Nune’e mós parte munisípiu Manatuto no Vikeke.

Jornalista         : Natalino Belo

Editór               : Evaristo Soare Martins

PUBLISIDADEiklan

HAKEREK NO HATÁN

Please enter your comment!
Please enter your name here