Diretór Ezekutivu FONGTIL, Daniel Santos do Carmo. Imajen Tatoli/Francisco Sony

DILI, 06 dezembru 2021 (TATOLI)—Forum Organizasaun Naun Govermentál Timor-Leste (FONGTIL), segunda ne’e lansa mídia advokasia podcast ho objetivu atu hapara violénsia hasoru feto no labarik feto iha Timor-Leste.

Diretór Ezekutivu FONGTIL, Daniel Santos do Carmo, hateten objetivu kria studiu podcast mak atu reforsa advokasia liuhosi disemina informasaun ba públiku no ema-ne’ebé foti desizaun hodi kombate problema sosiál, liu-liu problema violénsia hasoru feto no labarik feto iha rai laran.

“Ita fó fó oportunidade ba públiku hanesan, NGO, Institusaun Governu, Organizasaun Juventude no Organizasaun relevante sira, hodi hato’o aspirasaun no persepsaun liuhosi diskusaun hodi diskute kona-ba asuntu prioridade inklui problema sosiál,” Daniel Santos do Carmo hateten liuhosi ninia diskursu iha ámbitu lansamentu podcast iha Caicoli, Díli.

Atividade kria studiu advokasia nu’udar atividade ne’ebé inspiradu hosi kursu advokasia ba transformasaun jeneru, tanba daudaun ne’e ema moris iha era dijitalizasaun no maioria ema hotu-hotu asesu ona ba kanal internet hanesan youtube, facebook no sira seluk.

Ida-ne’e atu haforsa advokasia hodi muda opiniaiun públiku no mós desizaun públiku sira liuhosi kria podcast ne’e, hanesan meiu diálogu ka diskusaun ne’ebé rekorda liuhosi video hodi fahe ba iha kanal internet sira hodi públiku bele asesu.

Benefisiu hosi kria studiu podcast mak fó espasu ba membru ONG no Sosiedade Sivil sira hodi aprezenta deskobrementu, talentu, aspirasaun nomós bele promove produtu ONG sira nian ba públiku no reforsa advokasia ba muda desizaun públiku sira.

Métodu ba utilizasaun podcast mak halo diskusaun ho modelu talk show hanesan iha rádiu, maibé liuhosi gravasaun ka transmisaun direta liuhosi kanal internet no rai hanesan dokumentasaun.

Jestora Subvensaun Públika, Unidade Auditóriu Social, Gabinete Primeiru Ministru, Nori Maria Soares, hateten atividade ne’e importante tebes tanba Unidade Auditóriu Social parseria ho FONGTIL, ne’ebé uluk asina nota entendimentu ida hahú hosi 2015 no fó fundu ba membru ONG sira-ne’ebé halo atividade iha setór importante haat hanesan edukasaun, saúde, agrikultura, infraestrutura bázika no asesibilidade ba ema ho defisiénsia.

“Meiu ida-ne’e importante atu sira bele haree direta podcast, atu nune’e bele hafanu sira atu sira hanoin bebeik deskobrimentu sira-ne’ebé membru FONGTIL sira foti,” nia dehan.

Diretór Asia Justice and Rights (AJAR), José Luís de Oliveira, apresia ba inisiativa inovasaun ne’ebé FONGTIL foti hodi dezenvolve podcast iha FONGTIL, hosi ne’e karik bele ajuda mós parseiru sira atu aban bainrua divulga informasaun sira, aleinde ne’e bele halo advokasia hapara violensia ba feto no labarik feto sira iha Timor-Leste.

“Ha’u deseza katak, FONGTL seriu duni dezenvolve podcast, inklui prepara funsionáriu sira bele jere podcast ne’e atu buat ne’ebé ita mehi bele sai realidade,” nia dehan.

Espesialista programa inisiativa spotlight, Kathryn Robertson, hateten spotlight hanesan inisiativa ida ho fundu hosi Uniãun Europeia ne’e hola parte iha inisiativa boot iha mundu, kona-bá hapara violénsia hasoru feto no labarik feto.

“Ida ne’e importante, tanba ita atu hapara violénsia kontra feto ho labarik feto ita presiza servisu iha nível hotu-hotu iha sosiedade, hanesan ho Governu, sosiedade sivil, komunidade, Igreza, eskola no emprezáriu. Ne’eduni spotlight ne’e servisu iha nível barak no parseria ho FONGTIL liuhosi inisiativa konjunta hosi FONGTIL, ACBIT no AJAR,” nia dehan.

Sosiedade sivil iha parte importante loos kona-ba violénsia kontra feto no labarik feto, tanba bainhira laiha sosiedade sivil ne’ebé forte asisténsia ba feto no labarik feto ladun la’o, tanba realidade ne’ebé akontense asisténsia barak liuhosi uma mahon, fatin hakmatek no organizasaun sosiédade sivil.

Entretantu, podcast hanesan média online gravasaun ne’ebé públiku bele rona no haree liuhosi internét no la hanesan ho rádiu, ne’ebé tenke hala’o no fó sai iha tempu balun de’it maibé bele implementa podcast iha kualkér tempu no bele rona no hare liuhosi mídia eletrónika ne’ebé eziste hanesan kanal youtube, facebook no seluk tan.

Jornalista : Nelia Fernandes

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here