Prezidente Conselho de Imprensa, Virgio da Silva Guterres, hala’o enkontru ho autoridade lokál iha Covalima. Imajen Tatoli /Celestina Teles.

COVALIMA, 06 dezembru 2021 (TATOLI)—Prezidente Conselho de Imprensa (CI), Virgílio da Silva Guterres, hateten Conselho de Imprensa nia nia prezensa iha Covalima atu halo sensibilizasaun kona-ba direitu resposta ba autoridade municipal no lokál sira hodi utiliza sira-nia direitu resposta bainhira hasoru notisia ruma ne’ebè fo sai lá tuir sira-nia deklarasaun.

“Ami fahe informasaun konaba papel konselu imprensa, atu enkoraja autoridade sira hodi utiliza direitu resposta hasoru notisia ruma ne’ebè fo sai la tuir sira-nia deklarasaun,” Virgílio da Silva Guterres hateten ba jornalista sira hafoin hala’o enkontru ho autoridade lokál sira iha salaun administrasaun Covalima, segunda ne’e.

Tanba, nia hatutan, autoridade munisípiu sai fonte informasaun tanba jornalista barak komunika fontes liuhosi kapitál mak mai munisípiu 

Durante ne’e, Conselho de Imprensa (CI) mós sensibiliza ona CI nia papel no direitu resposta iha munisípiu sira seluk.

Xefe Sesaun Postu Administrativu Tilomar, Manuel Cardoso, hateten autoridade munisipál hala’o enkontru ho Conselho de Imprensa ko’alia kona-ba sira-nia papel asuntu importante mak hodi hato’o informasaun ne’ebé loos. 

“Ami rekomenda no husu jornalista hato’o informasaun ne’ebè loos. Iha biban ne’e, ami mós hato’o rekomendasaun kona-ba atividade iha Postu Administrativu sira atu buka informasaun hodi hato’o informasaun kona-ba preokupasaun komunidade sira-nian,” nia dehan. 

Autoridade sira husu ba Conselho de Imprensa atu koloka jornalista iha nivel postu no suku, nune’e bele hato’o komunidade nia preokupasaun ba Governu liuhosi halibur no publika notísia.

Direitu resposta

Utilizasaun direitu resposta no direitu retifikasaun ne’e haktuir iha Lei Komunikasaun Sosiál Kapítulu V (Direitu hodi Hatán no Haloos) iha artigu 34 (kondisaun sira hodi hala’o) iha alinea 1 hateten; Direitu hodi hatán no haloos, titulár ka saseluk legál mak tenke ezerse iha prazu loron-tolunulu (30), ne’ebé hahú sura hosi data publikasaun ka transmisaun ba konteúdu be ho objetivu hodi hatán no haloos.

Alinea 2 hateten, direitu hodi hatán no haloos kumpre ona bainhira iha konkordánsia hosi titulár ka ninia saseluk, meiu komunikasaun sosiál halo tiha koresaun ka esklaresimentu ba konteúdu ida-ne’e.

Iha alinea 3 dehan, testu hodi hatán ka haloos, ne’ebé identifika tiha ona, tenke hato’o ba responsavel másimu órgaun komunikasaun sosiál.

Alinea 4 haktuir, testu hodi hatán ka haloos tenke publika ka transmite iha edisaun tuirmai ba data simu nian, tuir duni kritériu vizibilidade ba konteúdu ne’ebé hamosu nia.

Alinea 5 haklaken, lala’ok hodi haloos nu’udar inkluzaun obrigatóriu no la bele rekuza, no alinea 6 dehan testu hodi hatán bele rekuza bainhira: (alinea 7) hakat-liu ámbitu referénsia sira-ne’ebé hamosu testu ne’ebá; (alinea 8) hakat-liu sasukat fatin ka tempu konteúdu nian ne’ebé hamosu ba; (alinea 9) iha espresaun ne’ebé ofende ka lahó liafuan midar ba ema sé-sé de’it ka entidade sira-ne’ebé envolve-aan.

Iha alinea 10 hateten, responsavel editoriál ba órgaun komunikasaun halo rekuza tenke ho fundamentu no tenke fó-hatene ba titulár direitu iha loron tuirmai ba loron resepsaun testu hodi hatán, no alinea 11 dehan bainhira la iha fundamentasaun hodi rekuza ba ezersísiu direitu hodi hatán hamosu kontraordenasaun ne’ebé sei hetan kastigu hodi selu koima hosi $2.500 to’o $10.000.

Jornalista : Celestina Teles

Editór       : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here