Prezidente CI, Virgílio da Silva Guterres. Imajen Tatoli/Egas Cristovao

COVALIMA, 06 dezembru 2021 (TATOLI)—Conselho de Imprensa (CI) Timor-Leste, domingu ne’e atribui karteira profisionál ba jornalista destakadu sira iha munisípiu Covalima.

Prezidente Conselho de Imprensa, Virgílio da Silva Guterres, husu ba jornalista sira-ne’ebé simu karteita profisionál ne’e atu hatudu atitude di’ak iha públiku.

“Ha’u-nia kolega jornalista ne’ebè mak simu kartaun profisionál no kartaun ne’e hanesan identidade de’it atu hatudu profisionálionál. Profisionál ne’e mak hatudu ita-nia hahalok iha komunidade nia le’et mak importante,” Virgílio da Silva Guterres husu ba jornalista sira liuhosi diskursu bainhira atribui kartaun profisionál ba jornalista sira iha munisípiu Covalima, domingu ne’e, 

Jornalista ne’ebé iha abilidade di’ak tenke la’o tuir dalan hodi labele arbiru no tenke respeita públiku no fonte sira atu labele hamosu konflitu entre jornalista no fonte, no labele halo akuzasaun ba ema no públika ho notisia laiha konfirmasaun.

Prezidente CI ne’e mós apela apela ba jornalista sira, bainhira iha jornalista ida hakarak deside atu tuir kampañia eleitorál iha eleisaun jerál ne’e, tenke entrega kartaun profisionál ba Conselho de Imprensa no hafoin kampaña finaliza mak bele foti fali iha Conselho de Imprensa.

Tuir nia, jornalista sira tenke apoiu no fó solidariedade ba malu bainhara jornalista balun hetan problema iha terreñu ne’e tenke apoiu malu. 

“Jornalista iha munisípio Covalima tenke fó solidariedade ba malu. Ida-nia problema sai ita hotu nia problema. Hanesan hasoru violénsia verbal ka fizika ho ita-nia autoridade seguransa sira,  ita hotu tenke apoiu halo advokasia, lábele husik jornalista enfrenta nia problema mesak,” nia dehan. 

Prezidente Rádiu Comunidade Cova Taroman (RCCT), Edi Moniz, hato’o parabéns ba jornalista sira-ne’ebè maka hetan ona karteira profisionál. 

“Parabéns ba kolega sira, dalan ne’ebè ita buka to’o ona iha rezultadu. Ha’u motiva nafatin kelega sira seluk servisu ba Covalima tenke hato’o lia-loos no sai matan, tilun no ibun ba povu laija rezerva,” nia hateten 

Administradór postu administrativu Suai Vila, Luzinho do Rego reforsa, nia prezensa partisipa serimonia atribuísaun kartaun profesionál ba jornalista sira, atu apoiu sira hodi bele halo kobertura iha Covalima ho loloos no ho responsabilidade.

Tanba, nia dehan, ezistensia jornalista sira iha Covalima ajuda autoridade lokál hodi halo kobertura ba atividade Governu lokál nian iha implementasaun programa Governu nian liu-liu dezenvolvimentu iha rai Covalima.

Jornalista hirak-ne’ebè mak simu kartaun profisionál ne’e mai hosi instituisaun mídia sira hanesan jornalista destakadu hosi RTTL,EP iha Covalima  Biussines Timor, Tempo Timor no jornalista sira iha Rádio Comunidade Cova Taroman 

Iha serimonia atribuísaun kartaun profisionál jornalista ne’e atribui hosi Prezidente Conselho de Imprensa Virgílio da Silva Guterres, Konsilleiru Conselho de Imprensa Otelio Ote hamutuk ho ekipa CI, administradór postu administrativu Suai Vila, Luzinho do Rego, jornalista no estudante sira.

Iha lei Komunikasaun Sosiál, artigu 12 (Kapasidade) haktuir, bele sai nu’udar jornalista sidadaun maiór ne’ebé goza direitu sivíl tomak no ramata eskola ho pelumenú ensinu sekundáriu.

Tuir artigu 13 (Hala’o knaar) alinea 1 hateten nu’udar kondisaun hodi hala’o knaar jornalista, mak iha abilitasaun ho títulu rasik, hanaran karteira profisionál, ne’ebé Conselho de IMprensa halo no sei hafoun.

Iha alinea 2 haktuir, Governu aprova liuhosi dekretu-lei regulamentu karteira profisionál jornalista no jornalista estajiáriu sira-nian.

Alinea 3 hateten, to’o ba aprovasaun regulamentu ne’ebé temi iha númeru liubá, Conselho de Imprensa (CI) halo dokumentu provizóriu ida.

Iha alinea 4 dehan, sei rekoñese títulu profisionál sira jornalista nian ne’ebé halo tiha ona hosi rain estranjeiru no ninia portadór sira bele husu inskrisaun no emisaun títulu hosi Conselho de Imprensa, hodi dispensa estájiu profisionál.

Alinea 5 haklaken, laiha órgaun komunikasaun sosiál ida bele admite ka mantein ninia servisu nu’udar jornalista, sé mak la abilitadu ho títulu ne’e rasik.

Asesu ba profisaun

Iha artigu 16 hateten, atu hetan dalan ba profisaun nu’udar jornalista sei hahú ho estájiu obrigatóriu ida, ne’ebé ramata ho aproveitamentu, ho durasaun sanulu-resin ualu, fulan-sanulu-resin-rua no fulan-neen, ba sé mak iha ensinu sekundáriu rasik, lisesiatura iha área saida-saida  de’it no lisensiatura iha área komunikasaun sosiál.

Inskrisaun no títulu estajiáriu

Iha lei komunikasaun sosiál artigu 15 (Inskrisaun no titulu Estajuariu) iha alinea 1 hatete, estajiáriu tenke husu ninia inskrisaun no emisaun ba títulu rasik.

Alinea 2 haktuir, rekerimentu sei akompaña ho dokumentu hirak tuirmai:

a.) Deklarasaun komprovativu ba admisaun nu’udar estajiáriu iha órgaun ida komunikasaun sosiál, ne’ebé diretór asina, ho identifikasaun jornalista orientadór estájiu nian no númeru ba karteita profisionál ida-idak;

b.) Kópia dokumentu identidade; no c) Kópia sertifikadu abilitasaun literária.

Iha alinea 3 ne’e hateten, ttulu estajiáriu nu’udar dokumentu hodi halo identifikasaun jornalista estajiáriu nian no títulu abilitasaun bastante hodi hala’o atividade jornalístika.

Estájiu profisionál

Tuir artigu 16 iha alinea 1 haklaken, estájiu profisionál hala’o iha fatin ida órgaun komunikasaun sosiál nian, ne’ebé hodi hakle’an koñesimentu tékniku no linguístiku estajiáriu nian no ho nia rohan hodi fó ba nia koñesimentu kona-ba rejime jurídiku ba komunikasaun sosiál no direitu no devér ho natureza legál no étika ba profisaun jornalista.

Iha alinea 2 haktuir, jornalista ida ho esperiénsia tinan-lima liu iha profisaun ne’e, sei tuir estajiáriu, ne’ebé mak responsavel ba orientasaun estájiu.

Alinea 3 ne’e haktuir, estájiu iha komponente teóriku ida nomós komponente prátiku ida.

Alimea 4 ne’e hateten, iha estájiu nia laran, estajiáriu tenke halo pelumenús aktu no knaar hosi natureza jornalístiku lima hirak tuirmai:

a.) Redasaun, koordenasaun, eskolla ba títulu, integrasaun, koresaun ka koordenasaun matéria ne’ebé atu fó-sai iha komunikasaun sosiál, ne’ebé iha ka laiha komentáriu;

b.) Komentáriu ne’e ka krónika iha órgaun komunikasaun sosiál;

c,) Entrevista, inkéritu ka reportajen hakerek ka ko’alia iha komunikasaun sosiál;

d.) Planeamentu no organizasaun téknika servisu nian;

e.) Peskiza, rekolla, selesaun no tratamentu ba faktu, notísia, informasaun ka opiniaun no ninia preparasaun liuhosi testu, imajen ka lian hodi halo divulgasaun iha komunikasaun sosiál;

f.) Revizaun orijinál ba matéria jornalístiku no halo peskiza ba dadus ida-idak hodi halo notísia;

g.) Organizasaun no konservasaun hodi halo arkivu jornalístiku no peskiza ba dadus ida-idak hodi halo notísia;

h.) Fahe testu, fotografia ka ilustrasaun ho karáter jornalístiku hodi halo divulgasaun;

i.) Halo dezeñu artístiku ka tékniku ho karáter jornalístiku.

Iha alinea 5 esplika, órgaun komunikasaun sosiál halo sertifikadu ida bainhira ramata estájiu ho aproveitamentu, sertifikadu ne’e sei tau hamutuk ho dokumentu komprovativu sira ba hala’o aktu tuir natureza jornalístika ne’ebé temi tiha ona iha númeru liubá.

Aliena 6 hateten, estájiu ramata ho ezame ida, ne’ebé Conselho de Imprensa halo, iha ezame ne’e estajiáriu tenke hatudu koñesimentu kona-ba étika profisionál, direitu no devér sira jornalista nian, knaar no devér komunikasaun sosiál, knaar Estadu nian iha setór komunikasaun sosiál no kestaun hirak seluk relevante ba rejime jurídiku atividade jornalístiku nian.

Iha alinea 7 mós hateten, estájiu sei halo iha rejime okupasaun prinsipál, permanente no renumeradu ho pelumenu saláriu mínimu nasionál

Inkompatibilidade

Jornalista, tuir lei komunikasaun sosiál, artigu 17 (Inkompatibilidae ka labele hala’o tan knaar hirak seluk) iha alinea 1 hateten, profisaun nu’udar jornalista labele hala’o hamutuk iha tempu hanesan ho knaar hirak seluk tuirmai; a.) Funsionáriu públiku; b.) Titulár ba kargu iha órgaun soberania ida, iha órgaun podér lokál ka lideransa komunitária; c.) Dirijente partidu polítiku; d.) Relasaun públika ka asesór ba imprensa, komunikasun no imajen; no e.) Atividade saida de’it ne’ebé ho rohan hodi promove bein ka servisu liuhosi forma publisidade.

Aliena 2 haktuir, saida mak hakerek iha alínea a) númeru liubá sei la aplika ba funsionáriu públiku sira-ne’ebé atu hala’o knaar nu’udar jornalista iha órgaun komunikasaun sosiál Estadu nian.

Iha alinea 3 hateten, bainhira hala’o knaar espesífiku iha nº 1, profisionál ne’e tenke fó filafali títulu rasik identifikasaun ba Konsellu Imprensa hodi impede hala’o atividade jornalístiku.

Alienia 4 ne’e haktuir, hapara impedimentu bainhira de’it hapara situasaun ne’ebé hamosu impedimentu ba, jornalista bele hala’o filafali ninia knaar nu’udar jornalista, bainhira fila-fali atu hola parte iha órgaun komunikasaun sosiál saida-saida de’it.

Iha alinea 5 ne’e esplika, bainhira sakar saida maka hakerek iha nº 1 sei hetan kastigu ho koima ida hosi $250 to’o $ 1.000.

Jornalista : Celestina Teles

Editór       : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here