OÉ-CUSSE, 06 dezembru 2021 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, hatuur fatuk dahuluk ba projetu mellora estrada foun ho kilómetru 7.200 iha sub-rejiaun Oésilo.

Projetu melloramentu estrada foun kilómetru 7,200 ne’e, hosi bairru Bitopa, aldeia Buqui, suku Usitasa’e hodi liga ba bairru Paut, aldeia Oébaha, suku Bobometo, sub-rejaun Oésilo, ho orsamentu rihun $32, ne’ebé ezekuta hosi Unidade Jestaun Ekipamentu (UJE) ho durasaun serbisu fulan-haat.

Prezidente Autoridade RAEOA, Arsénio Paixão Bano, fó-sai katak iha tinan kotuk autoridade hamutuk ho tékniku sira hosi Diresaun Rejionál Infraestrutura konsulta ho komunidade no autoridade lokál sira, nune’e iha tinan ne’e hahú konstrusaun.

“Ita halo lansamentu ba estrada foun Oésilo, atu fasilita inan-aman sira, transporte públiku no privada sira, tanba iha tempu udan komunidade hosi Oésilo Pássabe no Nítibe lori produtu ba merkadu susar tebes tanba hakat mota no transporte sira labele liu, tanba ne’e maka autoridade iha tinan ne’e ita hahú loke estrada foun ne’e, atu fasilita mós estudante sira, ne’ebé hala’o estudu iha Pante Makassar,” Arsénio Paixão Bano, informa ba Agência Tatoli iha Oé-Cusse, segunda ne’e.

Xefe suku Usitasa’e, Tomás Ulan Colo, agradese ba autoridade tanba tinan ne’e rezolve estrada Bitopa ba Oébaha hodi fasilita atividade komunidade atu asesu ba merkadu iha tempu udan.

“Estrada ne’e uluk kedas, vizita Prezidente Repúblika atuál Primeiru Ministru Taur Matan Ruak, ha’u rasik aprezenta direita iha ami-nia suku, mumentu ne’ebá promete atu rezolve, no tinan ne’e autoridade konsege rezolve ona. Ida-ne’e ami agradese ba Governu tanba responde ona ami-nia nesesidade tanba kuandu tempu udan ema ho transporte labele ba tanba mota sa’e, tanba mota ne’e nia distánsia luan tebes,” nia orgullu.

Entretantu, Diretór Rejionál Infraestrutura, Candido dos Reis Amaral, hatete, melloramentu estrada foun ne’e, konstrui ho pakote kompleta kedas ho ponte no valeta nune’e bele hafasil komunidade hodi asesu ho di’ak. Projetu melloramentu estrada foun iha Oesilo ne’e lansa iha sábadu semana kotuk.

Notísia relevante: MOP RAEOA aloka rihun $42 mellora estrada foun iha Oésilo

Jornalista         : Abílio Elo Nini
Editór               : Evaristo Soares Martins
 

PUBLISIDADEiklan

HAKEREK NO HATÁN

Please enter your comment!
Please enter your name here