Prezidente Autoridade RAEOA, Arsénio Paixão Bano. Imajen Tatoli/Abílio Elo Nini.

OÉ-CUSSE, 06 dezembru 2021 (TATOLI) — Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, enkoraja dirijente servisu saúde atu mellora servisu liuhosi liña koordenasaun hodi promove atendimentu públiku iha área saúde.

“Ha’u husu de’it kargu diretór, xefe departamentu sira no sekretáriu, ita boot sira tenke ko’alia ba malu barak-liu, koordena no komunika malu kona-ba melloramentu servisu iha rejiaun ba área saúde nian,” Arsénio Paixão Bano, ko’alia asuntu ne’e bainhira dirije hasa’e bandeira iha Santa Rosa, Oé-Cusse, segunda ne’e.

Autoridade ne’e informa, Oé-Cusse maske ema la-barak, maibé tenke aposta iha servisu ekipa, tan ne’e mak husu dirijente sira iha servisu saúde, presiza promove beibeik enkontru atubele diskute oinsá bele mellora di’ak liután iha serbisu fatin.

“Tanba iha 2022 ba oin, servisu sei barak atu halo, tinan ne’e ita harii fasilidade armazein, laboratóriu, banku sangue, sala Unidade Kuidadu Intensivu, sala izolamentu iha ospitál, nomoos sei harii tán sala ba moras Tuberkuloze. Ida-ne’e presiza koordenasaun tanba servisu sei aumenta,” nia katak.

Nia dehan, fasilidade rekursu tenke kualidade no oras ne’e hahú hadi’a daudaun, tanba ne’e presiza kria komunikasaun di’ak iha servisu fatin.

“Ha’u hakarak Oé-Cusse tenke hatudu profisionál hatudu diferensa, tanba ita mak responsavél ba povu Oé-Cusse tomak,” nia apela.

Nia apela ba profisionál saúde no dirijente sira iha servisu saúde, tenke servisu maka’as, promove amizade no minimiza interese kór polítika.

“Ha’u akompaña iha tinan hirak nia laran, iha funsionáriu balun servisu la fó laran, tanba depende liu ba polítika no familiarizmu, maibé atu hatete de’it, buat ne’e selesaun naturál. Sé mak servisu baruk lakohi fó laran neineik sei la uza, tanba iha mai servisu iha-ne’e, ba komunidade Oé-Cusse, tán ne’e tenke hatuur profisionál, tenke aserta imi-nia pensamentu ne’e loloos,” nia apela.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here