Membru MAEKOM. Imajen/Espesiál.

DILI, 05 dezembru 2021 (TATOLI)—Movimentu Asaun Ekonómia Komunitária (MAEKOM) sesta (03/12) ne’e, rejista ona iha notariadu Ministériu Justisa atu sai fundasaun ida hodi hala’o nia-knaar iha setór edukasaun, advokasia, peskiza dezenvolvimentu, formasaun no jestaun negósiu ho Governu.

Notísia Relevante: PM Louva Vontade MAEKOM ho Madre Canossiana Tanba Valoriza Produtu Lokál

Prezidente Fundasaun MAEKOM, Rui Manuel de Castro Pereira hateten, vizaun ba fundasaun MAEKOM ne’e mak atu asegura soberania ekonómia komunitária ba povu Timor-Leste ne’ebé sai forte, justu no sustentavel.

“Molok MAEKOM sai fundasaun, ami hala’o ona nia serbisu iha setór produtivu dezde outubru tinan 2018. MAEKOM funda hosi timor-oan ho sira-nia estudu no esperiénsia oioin iha área agrikultura, defeza, komunikasaun, petróleu, negósiu, saúde, informasaun teknolojia, legál, no enjeñaria ho objetivu prinsipál mak atu organiza ekonomia Timor-Leste hahú husi baze,” Rui Castro liuhosi komunikadu imprensa ne’ebé Agência Tatoli aseseu, domingu ne’e.

Prezidente Fundasaun MAEKOM, Rui Castro dehan, misaun loloos hosi fundasaun refere mak oinsá haberan família sira iha koñesimentu ba negósiu sira no sai na’in ba negósiu ne’e rasik.

Liuhosi rejistu Fundasaun MAEKOM iha notariadu, MAEKOM rasik sei iha péritu sira hodi halo advokasia, edukasaun, peskiza no dezenvolvimentu, formasaun no jestaun negósiu hodi transforma mentalidade komunidade nian hodi asegura família ida, negósiu-ida.

“Fundasaun MAEKOM-nia investimentu iha setór produtivu iha tinan-tolu nia-laran, ami konsege habelar ona ami-nia rede negósiu iha munisípiu 12, inklui Rejiaun Administrativu Espesiál Oé-Cusse Ambeno (RAEOA) ho membru advokasia na’in-19,” nia hateten.

Nia rekoñese, molok Timor-Leste enfrenta pandemia COVID-19, Fundasaun MAEKOM rasik nia kapitál investimentu hodi hakiak manu-frangu ka broiler iha Timor-Leste hahú hosi outubru 2018 to’o iha fulan abril 2020, kontribui ona maizumenus 3% hosi nesesidade merkadu nasionál kada fulan, maibé númeru ne’e tun tebes bainhira enfrenta pandemia COVID-19.

MAEKOM legalmente eziste ona iha Timor-Leste nu’udar fundasaun ida, sei serbisu foku iha área lima hanesan advokasia, edukasaun, peskiza no dezenvolvimentu, formasaun no jestaun negósiu ho Governu, parseiru dezenvolvimentu, Ajénsia Nasaun Unida, sosiedade sivíl, no setór privadu sira hodi kontribui ba dezenvolvimentu nasionál liu-liu setór produtivu sira.

“Fundasaun MAEKOM sei iha Nota Entendimentu ho parseiru dezenvolvimentu balun hodi fó formasaun no kria tan empreendedorizmu foun iha tempu badak,” nia dehan.

Jornalista : Arminda Fonseca

Editór        : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here