Diretór Ezekutivu Centro Nacional Chega! I.P, Da Memória À Esperança, Hugo Maria Fernandes, partisipa reuniaun dahuluk ho ministériu relevante atu harii Komisaun Konsultiva Patrimóniu Kulturál (KKPK). Imajen/Mídia CNC.

DILI, 05 dezembru 2021 (TATOLI)—Diretór Ezekutivu Centro Nacional Chega! I.P, Da Memória À Esperança, Hugo Maria Fernandes, partisipa reuniaun dahuluk hamutuk ho Diretór Jerál, nasional, asesor no xefe gabinete sira husi liña Ministeriais hanesan MTKI, MOP, SEAK, MESSK, MJ, MPO no SEMA hodi estabelese Komisaun Konsultiva Patrimóniu Kulturál (KKPK).

Reniaun ne’e hala’o iha kinta (02 dezembru) ne’ebé lidera husi Diretór Jerál Arte Kultura iha Ministeriu Ensinu Superior, Siénsia no Kultura (MESSK) no Sekretáriu Estadu Arte no Kultura, Manuel Ximenes Smith, iha salaun MESSK, Colmera, Dili.

Diretór Exekutivu Centro Nacional Chega, Hugo Maria Fernandes, agradese ba Ministeriu Ensinu Superior Siénsia no Kultura (MESSK) no Sekretaria Estadu Arte no Kultura ba konvite hodi partisipa iha reuniaun estabelesimentu Komisaun Konsultiva Patrimoniu Kulturál.

Diretór Ezekutivu Centru Nacionál Chega (CNC), Hugo Maria Fernandes. Imajen Tatoli/Francisco Sony.

“Durante ne’e halo ona servisu lubuk ida kona-ba identifikasaun ba sitiu istóriku. CNC iha kategoria haat  ba identifikasaun sitiu istóriku, dahuluk identifikasaun ba sentru detensaun sira, daruak fatin akontesimentu masakre, datoluk fatin halo demonstrasaun no dahaat fatin abrigu,” Hugo Maria Fernandes hateten liuhosi komunikadu imprensa ne’ebé Agência Tatoli asesu, domingu ne’e.

Centro Nacional Chega!mI.P, Da Memória À Esperança hamriik nu’udar institutu públiku ida-ne’ebé estabelese ho dekretu-lei númeru 48/2016 no tutela direitamente ba Primeiru Ministru.

CNC nia vizaun mak sosiedade ida-ne’ebé inkluzivu, la repete istória passadu nian, moris iha dame, no respeitu ba direitu umanu.

CNC nia misaun mak harii sentru Pós-konflitu ne’ebé prezerva memória pasada nian hodi promove direitu no valór umanu, harii parseria nasionál no internasionál hodi reforsa rede servisu sira atu implementa rekomendasaun sira hosi Relatóriu Final Comissão de Acolhimento, Verdade e Reconciliação (CAVR)-Chega! No Comissão da Verdade e Amizade (CVA) – Per Memoriam Ad Spem, sira ne’ebé relevante.

Iha reuniaun ne’e, Diretór Jerál Arte Kultura, Manuel Ximenes Smith, hateten reuniaun ne’e estabelese Komisaun Konsultiva Patrimoniu Kulturál (KKPK) nu’udar faze dahuluk ho objetivu atu fó hanoin ba malu oinsá estabelese KKPK nu’udar orgaun iha kompeténsia atu kontrola, prezerva patrimóniu kulturál no fó rekomendasaun ba órgaun kompetente atu fó protesaun, finansiamentu, no utilizasaun ba patrimóniu kulturál.

Komisaun ne’e kria ho baze ba konstituisaun RDTL, alina g, artigu 6, estabelese objetivu fundamentál Estadu mak atu hakarak no haloko povu timor-oan nia personalidade no nia liman rohan kulturál. Baze Baze ne’e reforsa mos artigu 59, alinea 1, 2 no 5, Estadu rekoñese no garante sidadaun hotu nia direitu ba kultura, Estadu tenke garante sidadaun hotu-hotu tuir sira nia kapasidade atu hamoris/haburas arte, no ema hotu iha direitu atu goza no harii kultura hanesan nia obrigasaun atu haburas, defende no mós fó valór ba patrimóniu kulturál.

Nune’e mós, rejime jurídiku patrimoniu kulturál ho dekretu-lei númeru 33/2017 hodi fo kbiit ba Komisaun Konsultiva Patrimoniu Kulturál (KKPK) atu halo prezervasaun patrimónia kulturál tanba elementu hosi património kulturál kompostu hosi patrimóniu kulturál imovel, patrimóniu materiál movel no patrimóniu immaterial.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here