Jogador TL no Thailandia tenta hadau malu bola. Imajen/Midia AFF.

DILI, 05 novembru 2021 (TATOLI)–Ekipa Lafaek la konsege rekolla vitoria kontra ekipa Elefante Thailandia ho skor 0-2 iha jogu primeiru Asian Football Federation (AFF) Suzuki Cup ne’ebé hala’o iha Singapura, domingu kalan ne’e.

Iha primeira parte, iha minutu dahuluk, ekipa Timor-Leste kontra Thailandia, komesa lansa kontra no atake ba malu tuir téknika no abilidade ida-idak nian ne’ebé orienta hosi treinadór na’in-rua.

Maske nune’e, iha jogu ne’e ekipa Thailandia domina liu bola kompara ho ekipa Timor-Leste tanba ekipa Thailandia halo presaun makaas, maibé ekipa Lafaek hala’o jogu ho kalma hodi simu-hasoru presaun hosi ekeipa Elefante ne’e.

Oportunidade barak monu ba Thailandia atu hatama golu maibé jogadór sira la aproveita oportunidade hirak ne’e ho di’ak, entaun labele hatama golu ho lais.

Iha minute 45 dahuluk nian, ekipa Elefante hala’o jogu ofensiva no hala’o jogu meiu kampu maibé ambisaun no esforsu hirak ne’e hela de’it esforsu, tanba la rezulta golu hodi muda rezultadu to’o primeira parte ramata ho skor 0-0.

Timor-Leste joga ho kalma maske ladún hetan oportunidade di’ak hodi fó ameasa ba guarda rede Thailandia nian maibé jogadór na’in 11 ne’e konsege salva bola barak iha lina perigu, nune’e to’o jogu primeira parte termina laiha golu ruma mak akontese ba ekipa rua ne’e.

Tama ba segunda parte, ekipa rua hatudu jogu ho rítmu moris liután tanba jogadór sira halo kontra no atake ne’ebé ho velosidade aas. Hosi kontra no atake hirak ne’e Timor-Leste nafatin falla hetan oportunidade ne’ebé di’ak hodi fó ameasa ba guarda rede Thailandia nian.

Thailandia uza oportunidade ida-ne’e hodi hatudu jogu ho rítmu lais hodi pasa bola hosi ain baa in, no monu iha minute 51, jogadór Caroenrat Tanapirom (14) lansa golu dahuluk hodi muda skor 1-0.

Golu bele golu maibé ho golu ne’e la hamate jogadór Timor-Leste nia espíritu hodi hatudu jogu bonitu iha kampu laran ho di’ak maibé laiha biban atu bele hatama golu ba ekipa adversáriu nia rede.

Ho golu ida-ne’e hetok halo ekipa adversariu la fó fatin ba jogadór Timor-Leste atu kontra-atake, nune’e iha minutu 61, jogadór Thailandia Sarachart (7) hatama tan golu ida hodi muda rezultadu ba 2-0.

Ho golu daruak ne’e, to’o segunda parte termina, laiha tán golu ruma mak akontese entaun ekipa Thailandia manan Timor-Leste ho skor 2-0.

Maske lakon maibé Timor-Leste sei iha oportunidade hodi hala’o tan tolu hodi kontra hasoru Filipina, Singapura no Myanmar iha kompetisaunSuzuki Cup. Bainhira jogu tolu ne’e Timor-Leste manan mak sei kontinua ba jogu sira tuir mai.

Jornalista : Hortencio Sanchez

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here